17.05.2026 | 20:32
ՆԱՏՕ-ի ինքնաթիռները Լատվիայում օդ են բարձրացվել անօդաչու թռչող սարքի պատճառով
Թուրքիայից հայտարարում են, որ միջազգային դերակատարները «պետք է ընդունեն Արցախյան 44-օրյա պատերազմում Ադրբեջանի հաղթանակը»
Քաղաքականություն
20.12.2022 | 15:25
Անկարայում անցկացվող թուրք-ֆրանսիական հարաբերություններին նվիրված համաժողովում Թուրքիայի նախագահի աշխատակազմի հանրային կապերի բաժնի ղեկավար Ֆահրեթթին Ալթունն անդրադարձել է նաև Արցախյան հակամարտությանը, գրում է Անադոլու գործակալությունը։
«Կցանկանայի սա շատ հստակ ընդգծել․ միջազգային իրավունքի համաձայն՝ Ղարաբաղն Ադրբեջանի տարածք է։ Ղարաբաղյան հիմնախնդրի մշտական լուծումը, քանի դեռ այն չի վերածվել նոր թեժ հակամարտության, ձեռնտու է բոլորին։ Դա տարածաշրջանի երկրների շահից է բխում, դա անհրաժեշտ է գլոբալ խաղաղության համար»,- ասել է Ալթունը։
Ստացվում է, որ թուրք-ադրբեջանական տանդեմն այնքան էլ միակարծիք չէ Արցախյան հակամարտության հարցում։ Մասնավորապես, պաշտոնական Բաքուն անընդհատ նշում է, որ ԼՂ հակամարտությունը լուծվել է, իսկ Անկարան հիմա այլ կարծիք է բարձրաձայնում։
Ալթունը նաև ասել է, որ «միջազգային բոլոր դերակատարների համար կարևոր է ընդունել Ղարաբաղում Ադրբեջանի հաղթանակը և իրենց քաղաքականությունը ձևավորել այդ իրողության շուրջ»։
Նա նաև նշել է, որ տարածաշրջանում խաղաղություն հաստատվելուն պես բարգավաճում է լինելու, որից շահելու են բոլորը։
«Մենք ակնկալում ենք, որ Ֆրանսիան կաջակցի Թուրքիայի ջանքերին այս հարցում»,- ասել է Ալթունը՝ միաժամանակ հավելելով, որ Ֆրանսիայում «հակաիսլամիզմ և մահմեդականների դեմ համակարգված խտրական մոտեցում կա»։
Էմմա Չոբանյան
