16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
ՀՀ-ն ՄԻԵԴ-ից որևէ պատասխան չի ստացել Ադրբեջանի դիրքորոշման մասով. Միջազգային իրավական հարցերով ՀՀ ներկայացուցչի գրասենյակ
Քաղաքականություն
20.12.2022 | 14:00
Միջազգային իրավական հարցերով ՀՀ ներկայացուցչի գրասենյակը Մարդու իրավունքների եվրոպական դատարանից դեռևս որևէ պատասխան չի ստացել։ Այս մասին Factor.am-ի հետ զրույցում ասաց գրասենյակի մամուլի պատասխանատու Հասմիկ Սամվելյանը։
«Այս պահին դեռևս որևէ պատասխան չկա։ Օրվա ընթացքում նորության դեպքում լրացուցիչ կտեղեկացնենք»,- նշեց Սամվելյանը։
Հիշեցնենք՝ երեկ Ֆրանսիայի ժամանակով 16:00-ին լրանում էր Ադրբեջանի կողմից ՀՀ-ի դիմումին պատասխան ուղարկելու վերջնաժամկետը։ Միջազգային իրավական հարցերով ՀՀ ներկայացուցչի գրասենյակը դեկտեմբերի 14-ին դիմել էր ստրասբուրգյան դատարան՝ պահանջելով կիրառել միջանկյալ միջոցներ Ադրբեջանի նկատմամբ և պարտավորեցնել վերջինիս ապաշրջափակել Բերձորի (Լաչինի) միջանցքը:
Արտաքին գործերի նախարարությունն այսօր տեղեկացրեց, որ այսօր կեսգիշերին՝ 00:00-ին Հայաստանի դիմումի հիման վրա ՄԱԿ Անվտանգության խորհրդում կքննարկվի Լաչինի միջանցքում ստեղծված իրավիճակը։
Հիշեցնենք՝ դեկտեմբերի 12-ից Ադրբեջանը փակ է պահում Արցախը Հայաստանին կապող միակ ճանապարհը։ 1100 քաղաքացի, որից 270-ը՝ անչափահաս, տուն վերադառնալու հնարավորություն չունի: Շուշիի հատվածում միջանցքը փակած ադրբեջանցիներն իրենց անվանում են անկախ բնապահպաններ, թեև նրանց նույնականացումն այլ բան է վկայում։ Միջանցքը փակ է նաև շտապօգնության մեքենաների համար։ Արցախի հիվանդանոցները չեն ստանում անհրաժեշտ բժշկական ապրանքներ ու դեղորայք, մթերային խանութների դարակները կիսադատարկ են։
Ռոզա Վարդանյան
