16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
ԱՄՆ-ը Բելառուսին սպառնում է նոր պատժամիջոցներով, եթե Մինսկը օգնի ՌԴ-ին Ուկրաինայի դեմ պատերազմում
Քաղաքականություն
20.12.2022 | 16:25
Վաշինգտոնը շարունակելու է հետևել՝ արդյո՞ք Բելառուսը Մոսկվային լրացուցիչ օգնություն ցուցաբերելու է Ուկրաինայի դեմ պատերազմում, և եթե դա տեղի ունենա, Մինսկի դեմ կարող են նոր պատժամիջոցներ սահմանվել։ Այս մասին հայտարարել է ԱՄՆ Պետքարտուղարության խոսնակ Նեդ Փրայսը, գրում է BBC-ի ռուսական ծառայությունը։
«Եթե մենք դա տեսնենք՝ լրացուցիչ աջակցության փորձ, համաչափ պատասխան կտանք լրացուցիչ միջոցների սահմանմամբ»,- ասել է Փրայսը։
Նա մեկնաբանել է նաև Ալեքսանդր Լուկաշենկոյի հետ բանակցություններից հետո կայացած մամուլի ասուլիսում ՌԴ նախագահ Վլադիմիր Պուտինի հայտարարությունը, թե Ռուսաստանը չի պատրաստվում «կլանել» որևէ պետություն, այդ թվում՝ Բելառուսը։
Փրայսը դա անվանել է «ծաղրի գագաթնակետ»՝ նշելով, որ այս արտահայտությունը բխում է «երկրի ղեկավարի շուրթերից, որը հենց հիմա փորձում է բռնի կերպով կլանել իր մյուս խաղաղ հարևանին»։
Լուկաշենկոյի կախվածությունը Պուտինից մտավախություն է առաջացնում Կիևում, որ ՌԴ նախագահը կարող է, ի վերջո, ստիպել նրան՝ միանալ Ուկրաինայի դեմ Ռուսաստանի ռազմական գործողություններին:
Անցյալ շաբաթ Ուկրաինայի զինված ուժերի գլխավոր հրամանատար Վալերի Զալուժնին The Economist-ին տված հարցազրույցում ասել էր, որ Ռուսաստանը 200 հազար զինվոր է պատրաստում նոր հարձակման համար, որը կարող է սկսվել արդեն հունվարին հարավից, արևելքից կամ նույնիսկ Բելառուսի տարածքից։
Էմմա Չոբանյան
