07.06.2026 | 09:36
Վաղարշապատի ընտրատեղամասում քվեարկում են նաև զինծառայողները
Դատախազությունը պահանջում է Գևորգ Լոռեցյանին նորից կալանավորել
Հասարակություն
19.12.2022 | 13:53
Գլխավոր դատախազի տեղակալ Արթուր Պողոսյանը բողոքարկել է Կրթության, գիտության, մշակույթի և սպորտի նախկին փոխնախարար Գևորգ Լոռեցյանին գրավի դիմաց ազատ արձակելու որոշումը և պահանջում է Լոռեցյանի նկատմամբ գրավ կիրառելու որոշումը բեկանել ու կալանավորել։
Այս մասին տեղեկանում ենք «Դատալեքս» դատական-տեղեկատվական համակարգից։
Գևորգ Լոեցյանը, հիշեցնենք, մեղադրվում է «Լուառ» և «Էլիտ Սպորտ» առևտրային կազմակերպությունների սեփականատեր և գործադիր տնօրեն Հրաչիկ Քանանյանից 2 մլն դրամ կաշառք պահանջելու համար։ Փոխնախարար Լոռեցյանին սպասարկող վարորդ Էդուարդ Հովհաննիսյանը մեղադրվում է Լոռեցյանին օժանդակելու, իսկ Հրաչիկ Քանանյանը՝ կաշառք տալու մեջ։
Ըստ մեղադրանքի՝ ԿԳՄՍ նախարարի տեղակալը, նախարարության ենթակա հիմնարկների կարիքների համար մարզագույքի և մարզահագուստի ձեռքբերման նպատակով հայտարարված մրցույթներում աջակցություն ցուցաբերելով տնտեսվարող Հրաչիկ Քանանյանին՝ դրա դիմաց վարորդի օժանդակությամբ պայմանավորվածություն է ձեռք բերել ստանալ առանձնապես խոշոր չափերով կաշառք՝ գումար: Տնտեսվարողի կողմից գումարի մի մասը նախարարի տեղակալի վարորդին փոխանցելուց անմիջապես հետո վերջիններս բերման են ենթարկվել»։
Այս գործը 2020 թվականից քննվում է Երևանի ընդհանուր իրավասության դատարանում՝ դատավոր Արտուշ Գաբրիելյանի վարույթում։ Այս դատավորը բազմիցս մերժել է Լոռեցյանին ազատ արձակելու վերաբերյալ նրա պաշտպան Լևոն Սահակյանի միջնորդությունները։
Հերթական միջնորդությունը մերժելու որոշումը բողոքարկվել է Վերաքննիչ դատարան ու մակագրվել դատավոր Սերգեյ Մարաբյանին Դատական վերանայման արդյունքում դատավորը որոշել է Լոռեցյանի նկատմամբ 4 մլն դրամ գրավ կիրառել, և այս որոշման դեմ է Գլխավոր դատախազի տեղակալը Վճռանեկ բողոք ներկայացրել։
Նշենք, որ Լոռեցյանն իրեն առաջադրված մեղադրանքը չի ընդունում։
Արաքս Մամուլյան
