Քաղաքականություն
17.12.2022 | 12:21
Լաչինի միջանցքի փակումը պոտենցիալ ծանր հումանիտար հետևանքներ ունի և հետ է մղում խաղաղության գործընթացը: Այս մասին ճեպազրույցի ժամանակ հայտարարել է ԱՄՆ պետքարտուղարության մամուլի քարտուղարի առաջին տեղակալ Վեդանտ Պատելը:
«Մենք ուրախ ենք, որ Լեռնային Ղարաբաղ բնական գազի մատակարարումը վերականգնվել է: Էներգետիկ ենթակառուցվածքների խափանումները կարող են հումանիտար ճգնաժամ առաջացնել: Եվ մենք կոչ ենք անում հնարավորինս շուտ վերականգնել միջանցքով ազատ տեղաշարժը, և դրան հասնելու ճանապարհը բանակցություններն են»,- նշել է Պատելը:
Անդրադառնալով խաղաղության պայմանագրի կնքման հավանականությանը՝ Պատելն ասել է, որ չի կարող ժամանակացույց նշել: Նրա խոսքով, սակայն, ԱՄՆ պետքարտուղարը, ինչպես նաև պետքարտուղարության շատ ներկայացուցիչներ մեծ հետաքրքրություն են ցուցաբերում այդ հարցի նկատմամբ:
«ԱՄՆ-ը շարունակելու է խորապես ներգրավված մնալ այդ գործընթացին և այն ավարտին հասցնել»,- ընդգծել է Պատելը:
