Քաղաքականություն
16.12.2022 | 20:36
Հինգշաբթի ուշ երեկոյան ամերիկացի սենատորներն ընդունել են օրինագիծ, որը նախատեսում է տարեկան պաշտպանական ծախսերի ռեկորդային 858 միլիարդ դոլար, ինչը 45 միլիարդ դոլարով ավելի է, քան նախագահ Ջո Բայդենի առաջարկածը: Օրինագիծը նաև հանում է ԱՄՆ զինվորականների համար պարտադիր COVID պատվաստումները, գրում է VOA-ն։
Սենատորները պաշտպանել են «Պաշտպանության բյուջեի ակտը» (NDAA)՝ Պենտագոնի տարեկան բյուջեն՝ ճնշող երկկուսակցական մեծամասնությամբ (83 կողմ, 11 դեմ ձայներ):
Ընդունմանը դեմ են քվեարկել լիբերալները, ովքեր դեմ են ռազմական բյուջեի անընդհատ աճին, և պահպանողականները, ովքեր ցանկանում են խստացնել ծախսերի վերահսկողությունը: Անցյալ շաբաթ Ներկայացուցիչների պալատն արդեն ընդունել է նույն օրինագիծը, NDAA-ն ուղղարկվել է Սպիտակ տուն, որտեղ, ինչպես ակնկալվում է, նախագահ Ջո Բայդենն այն անմիջապես կստորագրի:
2023 ֆինանսական տարվա համար NDAA-ն նախատեսում է 858 միլիարդ դոլարի ռազմական ծախսեր և ներառում է զինվորականների աշխատավարձերի 4,6% աճ, զենքի, նավերի և օդանավերի գնման ֆինանսավորում և աջակցություն Թայվանին՝ Չինաստանի աճող սպառնալիքի պայմաններում և Ուկրաինային՝ ռուսական ներխուժման դեմ պայքարում։
Կոնգրեսը հաստատում է NDAA-ն ամեն տարի 1961 թվականից սկսած: «Սա ամենակարևոր օրինագիծն է, որը մենք ընդունում ենք ամեն տարի», – ասել է սենատոր Ջեյմս Ինհոֆը, Սենատի Զինված ծառայությունների հանձնաժողովի գլխավոր հանրապետականը:
Օրինագիծը Ուկրաինային տրամադրում է առնվազն 800 միլիոն դոլարի լրացուցիչ աջակցություն հաջորդ տարի անվտանգության համար և ներառում է մի շարք դրույթներ՝ ուժեղացնելու Թայվանի պաշտպանությունը Չինաստանի հետ աճող լարվածության պայմաններում, ներառյալ միլիարդավոր դոլարներ՝ Թայվանի համար սպառազինությունների արագացված գնումների համար:
Օրինագիծը նախատեսում է լրացուցիչ ֆինանսավորում հիպերձայնային զենքի ստեղծման, Հավայան կղզիներում Red Hill վառելիքի պահեստի փակման և սպառազինության համակարգերի, այդ թվում՝ Lockheed Martin կորպորացիայի կողմից արտադրված F-35 կործանիչների և General Dynamics-ի արտադրած նավերի գնման համար։
Տաթև Ֆռանգյան
