03.10.2026 | 22:08
Հայաստանի հավաքականը ժամանել է Պոդգորիցա
ՌԴ-ն պիտի՛ սանձի Ադրբեջանին, իրականացնի եռակողմ հայտարարության դրույթները. Արցախի ՄԻՊ․ ՏԵՍԱՆՅՈՒԹ
Քաղաքականություն
15.12.2022 | 18:27
Արցախի նախկին ՄԻՊ, ԱՀ պետնախարարի խորհրդական Արտակ Բեգլարյանը, ԱՀ մարդու իրավունքների պաշտպան Գեղամ Ստեփանյանը և նրանց կողմնակիցները բողոքի ակցիաներ են նախաձեռնել Երևանում` ԱՄՆ–ի, Չինաստանի, Ռուսաստանի, Ֆրանսիայի, Մեծ Բրիտանիայի դեսպանատների, ինչպես նաև ԵՄ պատվիրակության գրասենյակի մոտ։
Ակցիային մասնակցում են նաև Արցախի մարդու իրավունքների նախկին պաշտպաններ Ռուբեն Մելիքյանը, Յուրի Հայրապետյանը, ինչպես նաև Հայաստանի մարդու իրավունքների նախկին պաշտպան Արման Թաթոյանը, ԱԺ Մարդու իրավունքների և հանրային հարցերի մշտական հանձնաժողովի նախագահ Թագուհի Թովասյանը։
«Ռուսաստանի դերաակատարությունն առավել քան կարևոր է՝ որպես եռակողմ հայտարարության երաշխավոր, որպես այդ հայտարարության կողմ, որպես Արցախում միակ միջազգային ներկայացվածություն, նաև որպես ՄԱԿ Անվտանգության խորհրդի մշտական անդամ երկրներից մեկը»,- ՌԴ դեսպանատան դիմաց իրականացվող ակցիայի ժամանակ նշեց ԱՀ ՄԻՊ Գեղամ Ստեփանյանը։
«Արցախում գտնվող 2000 ռուս խաղաղապահներն ամենօրյա ռեժիմով տեսնում են, թե ինչպես է Ադրբեջանը խախտում 120 հազար արցախցիների իրավունքները։ Եվ այդ խախտումները պարբերաբար արձանագրվում են ՌԴ ՊՆ ամփոփագրերում։
ՌԴ-ն նաև տեսնում է, որ ադրբեջանական կողմը իրականացնում է նաև ռուսական խաղաղապահ զորակազմին որակազրկելուն ուղղված գործողություններ՝ նապակ ունենալով, որ 2025-ին խաղաղապահ զորակազմը դուրս բերվի Արցախից և Արցախի ժողովուրդը մնա առանց անվտանգության երաշխիքների։
ՌԴ-ն պետք է իր գործողություններով սանձի Ադրբեջանին։ Ռուսաստանը պարտավոր է իրականացնել եռակողմ հայտարարության դրույթները և ձեռնարկի անհրաժեշտ գործողություններ՝ Արցախում ապրող մարդկանց անվտանգությունը երաշխավորելու համար»,- նշեց Ստեփանյանը՝ վստահություն հայտնելով, որ ՌԴ-ն կարող է և ուզում է դա անել։
Մանրամասները՝ տեսանյութում։
