Պետք է փրկել Արցախի ժողվրդին. Գեղամ Ստեփանյանի կոչը ԵՄ-ին․ ՏԵՍԱՆՅՈՒԹ

Արցախահայերը ակցիաներ են նախաձեռնել՝ ԱՀ պետնախարարի խորհրդական Արտակ Բեգլարյանի և Արցախի ՄԻՊ Գեղամ Ստեփանյանի առաջնորդությամբ։

Նախատեսված է ակցիաներ իրականացնել ՀՀ-ում ԱՄՆ-ի, Չինաստանի, Ռուսաստանի Դաշնության, Ֆրանսիայի դեսպանատների, Եվրամիության պատվիրակության գրասենյակի առաջ՝ իրենց բողոքը հայտնելու Ադրբեջանի կողմից Լաչինի միջանցքը փակելու առնչությամբ։

Ակցիաների նպատակն է հասնել միջազգային հանրության կողմից Ադրբեջանի սադրանքների հասցեական դատապարտմանը, գործնական քայլերի՝ ուղղված Արցախի առաջ ծառացած հումանիտար ճգնաժամի հաղթահարմանը։

Ակցիայի մասնակիցներն այս պահին Հայաստանում Եվրամիության պատվիրակության գրասենյակի մոտ են։

«Եվրամիությունը, որն աշխարհում մարդու իրավունքների և ազատությունների վրա հիմնված կառույց է, համենայն դեպս, մենք այդպես գիտենք, որովհետև այդպես է ԵՄ-ն ներկայանում աշխարհին, այսօր իրավունք չունի լռելու այն հանցագործությունների, այն հանցավոր քաղաքականության վերաբերյալ, որը վարում է Ադրբեջանն Արցախի նկատմամբ»,- Եվրամիության պատվիրակության գրասենյակի դիմաց հայտարարեց Արցախի ՄԻՊ Գեղամ Ստեփանյանը՝ հավելելով, որ անկողմնակալություն և չեզոքություն պահպանելով՝ նպաստում են Արցախի ժողովրդի իրավունքների խախտմանը։

Արցախի ՄԻՊ-ն ընդգծեց, որ Եվրամիությունից ակնկալվում է ոչ միայն հայտարարություններ, այլ կոնկրետ քայլեր, որոնք կկասեցնեն Արցախի ժողովրդի նկատմամբ Ադրբեջանի ցեղասպան քաղաքականության շարունակականությունը։

«Արցախի ժողովրդի փրկության միակ ճանապարհը Արցախի անկախության ճանաչումն է․ ճանաչում՝ հանուն փրկության։ Պետք է ճանաչել Արցախի ժողովրդի ինքնորոշման իրավունքը և փրկել արցախցիների կյանքը»,- կոչ արեց Արցախի ՄԻՊ-ը։

Մանրամասները՝ տեսանյութում։