Լաչինի միջանցքը փակած ադրբեջանցիները նոր պահանջներ են առաջ քաշել՝ բացահայտելով Բաքվի իրական նպատակները

Լաչինի միջանցքն արդեն 4-րդ արգելափակած Բաքվի իշխանությունների պսևդոէկոլոգներն ու ակտիվիստները նոր պահանջներ են հնչեցրել, որով բացահայտում են Ադրբեջանի իրական նպատակները։

Ըստ երևույթին, հասկանալով, որ էկոակտիվիստ ձևանալն այնքան էլ համոզիչ չէ, Բաքվի ցուցարարները որոշել են ներկայացնել իրական պահանջները։ Մասնավորապես, ադրբեջանական քարոզչական լրատվամիջոցների փոխանցմամբ, «ակտիվիստները» պահանջում են Արցախի տարածքում Ադրբեջանի վերահսկողության սահմանում, այդ թվում՝ Ադրբեջանի ՆԳՆ-ի, Սահմանապահ ծառայության, մաքսային կոմիտեի հսկողություն և ադրբեջանական անցակետերի տեղադրում։

Իլհամ Ալիևի ուղարկած «ակտիվիստները» պահանջում են Լաչինում ստեղծել պետական ​​սահմանային ծառայության և պետական ​​մաքսային կոմիտեի անցակետեր։ Հարկ է նկատել, որ այս հայտարարությունները նույնական են Ադրբեջանի իշխանությունների հայտարարություններին։

Հիշեցնենք, որ ավելի վաղ Ադրբեջանի իշխանությունների կողմից գործուղված բնապահպանները դեկտեմբերի 7-ին բանակցություններ էին անցկացրել Արցախում ռուսական խաղաղապահ զորակազմի հրամանատար Անդրեյ Վոլկովի հետ Արցախի հանքերի մոնիթորիգի հարցով ու համաձայնության հասել ադրբեջանական կողմի հետ։ Այդպես էլ պարզ չդարձավ՝ ի՞նչ իրավասությամբ է Վոլկովը քննարկում Արցախի տնտեսությանն ու հանքարդյունաբերությանը վերաբերող հարցեր, որոնք իր իրավասությունների տիրույթից դուրս են։ Իսկ ահա Լաչինի միջանցքի անվտանգության ապահովումը, որը 2020թ․ նոյեմբերի 9-ի եռակողմ հայտարարությամբ ռուս խաղաղապահների պարտականությունն է, այդքան էլ լավ չի ստացվում։ Վոլկովի հետ պայմանավորվածություն ձեռք բերելուց հետո մի խումբ ադրբեջանցիներ, իբր, մոնիթորինգի համար հասել էին Կաշենի հանքավայր, սակայն տեղի բնակիչներն ու աշխատակիցները նրանց ներս չէին թողել։

Դեկտեմբերի 3-ին նույնպես Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ, իբր, բնապահպանական պատճառաբանությամբ կրկին փակել էին Ստեփանակերտ-Գորիս մայրուղին։

Էմմա Չոբանյան