07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Թուրքական դատարանը Ստամբուլի ընդդիմադիր քաղաքապետին՝ ընտրություններում Էրդողանի հավանական մրցակցին դատապարտել է 2 տարի 7 ամիս ազատազրկման
Քաղաքականություն
14.12.2022 | 21:14
Թուրքական դատարանն այսօր Ստամբուլի ընդդիմադիր քաղաքապետ Էքրեմ Իմամօղլուին դատապարտել է 2 տարի 7 ամիս ժամկետով ազատազրկման՝ իբրև Կենտրոնական ընտրական հանձնաժողովի ներկայացուցիչներին վիրավորելու համար։ Այս մասին հայտնում է Habertürk հեռուստաալիքը, գրում է ՏԱՍՍ-ը։
Քաղաքական գործիչն ավելի վաղ կոչ էր արել Ստամբուլի բնակիչներին հավաքվել ժամը 16։00-ին, երբ դատարանը հրապարակելու էր վճիռը։
«Ինչպիսին էլ լինի դատարանի որոշումը, ես սպասում եմ 16 մլն-անոց Ստամբուլի բոլոր բնակիչներին Սարաչխանում»,-թվիթերյան իր էջում գրել էր նա։
Հաղորդվում է, որ հազարավոր մարդիկ հավաքվել են քաղաքապետարանի շենքի մոտ։ Նշվում է, որ Թուրքիայի տարբեր քաղաքներից Ստամբուլ են մեկնում ընդդիմության ներկայացուցիչներ։ Հիմնական ընդդիմադիր Ժողովրդահանրապետական կուսակցության (CHP) առաջնորդ Քեմալ Քըլըչդարօղլուն ընդհատել է իր այցը Գերմանիա և վերադառնում է Ստամբուլ։
Եթե Իմամօղլուի դատավճիռը հաստատվի բարձրագույն մարմնի կողմից, Իմամօղլուն կարող է զրկվել իր պաշտոնից՝ քաղաքական գործունեություն ծավալելու հնգամյա արգելքի պատճառով։
Հավելենք, որ 2023 թվականին Թուրքիայում կայանալիք նախագահական ընտրություններում Իմամօղլուն գործող նախագահ Ռեջեփ Թայիփ Էրդողանի հիմնական մրցակիցներից է համարվում։ Տարբեր սոցհարցումների համաձայն՝ նա գերազանցում է Էրդողանին և ունի ընտրություններում հաղթելու լրջագույն հնարավորություն։ Այսպիսով, Էրդողանն իր ճանապարհն ազատում է լրջագույն մրցակցից։
Իմամօղլուի դեմ, որը ներկայացնում է CHP-ն, գործ էր հարուցվել 2019 թվականի քաղաքային ընտրություններից հետո։ Նա հաղթել է և՛ առաջին ընտրություններում, որոնք տեղի էին ունեցել մարտի 31-ին, սակայն ԿԸՀ-ն չեղարկել էր, և՛ երկրորդում՝ հունիսի 23-ին, ընդ որում, երկրորդը՝ զգալի առավելությամբ։ Ընտրություններում հաղթելուց հետո Իմամօղլուն մարտի 31-ի ընտրությունները չեղարկողներին «հիմար» էր անվանել։
Էմմա Չոբանյան
