Նախագիծը հետ չենք ուղարկի․ ավելի լավ է ինչ-որ բանից սկսենք․ Թունյանը՝ համընդհանուր հայտարարագրման մասին․ ՏԵՍԱՆՅՈՒԹ

ԱԺ տնտեսական հարցերի մշտական հանձնաժողովը խորհրդարանական լսումներ է նախաձեռնել՝ «ՀՀ հարկային օրենսգրքում փոփոխություններ և լրացումներ կատարելու մասին» և կից օրենքների նախագծերի փաթեթի վերաբերյալ:

ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանն իր ելույթում անդրադառնալով այն հարցին, թե արդյո՞ք համակարգը պատրաստ է վերոնշյալ բարեփոխման ներդրմանը, ընդգծեց, որ այդ հարցն իրենց ևս անհանգստացնում է:
«Բայց եթե սա հետաձգենք, համոզված եմ, վերջում ոչ մի բան չենք ընդունելու․․․ Նախագիծը հետ չենք ուղարկի, ավելի լավ է ինչ-որ բանից սկսենք»,- նշեց պատգամավորը։

Թունյանը հավելեց, որ համակարգը չի աշխատելու օրենքի նախագծի ընդունումից անմիջապես հետո. դեռ աշխատանքներ կան կատարելու:
Անդրադառնալով պատասխանատվության մեխանիզմներին՝ Բաբկեն Թունյանը նշեց, որ որոշ կետեր քննարկվելու ենթակա են․ նախազգուշացումների, պատասխանատվության միջոցներն ավելի մեղմացնելուն միտված փոփոխություններին կանդրադառնան առաջինից երկրորդ ընթերցման ժամանակահատվածում:

Հանձնաժողովի փոխնախագահի խոսքով՝ թվայնացման գործընթացին զուգահեռ պետք է զարգանա եկամուտների հայտարարագրման մեխանիզմը: «Այսինքն՝ այն փուլում, երբ եկամուտների հայտարարագրման համակարգը բոլորի համար ներդրված լինի, ենթադրվում է, որ թվայնացման մակարդակը հասած կլինի որոշակի բավարար մակարդակի»,- նշեց Թունյանը՝ հավելելով, որ առաջին քայլը կատարելուց հետո բոլոր շահագրգիռ կողմերի հետ համակարգը շտկելու են և էլ ավելի լավարկելու:

Մանրամասները՝ տեսանյութում։