Կիևն ԱԹՍ-ներով հարձակման է ենթարկվել․ Կլիչկո

Կիևի քաղաքապետ Վիտալի Կլիչկոն իր Telegram-ալիքում հայտնել է, որ տեղական ժամանակով 07:25-ին Կիևի մարզում և Ուկրաինայի մայրաքաղաքի երկնքում հակաօդային պաշտպանության ուժերը խոցել են 10 կամիկաձե անօդաչու թռչող սարք:

Կիևի շրջանային ռազմական վարչակազմի ղեկավար Ալեքսեյ Կուլեբան անօդաչու թռչող սարքերից հարձակումններն անվանել է «էներգետիկ տեռորի» շարունակություն։ Նա նաև իր Telegram ալիքում գրել է, որ Ուկրաինայի մայրաքաղաքում և տարածաշրջանում առավոտը սկսվել է «Շահիդ» անօդաչու թռչող սարքերի հարձակմամբ։ Վարչակազմի տվյալներով՝ խոցվել է 11 անօդաչու թռչող սարք։

BBC-ի լրագրողներն ուժեղ պայթյունների ձայներ են լսել օդային ռմբակոծության ազդանշանը հնչելուց անմիջապես հետո:

Կիևի ռազմական վարչակազմն ավելի ուշ հայտնել է, որ անօդաչու թռչող սարքի բեկորներն ընկել են քաղաքի կենտրոնում գտնվող երկու վարչական շենքերի վրա (Շևչենկովսկի շրջանում):

Ռուսաստանը հոկտեմբերի 10-ից հարվածներ է հասցնում Ուկրաինայի էներգետիկ ենթակառուցվածքին, ինչի հետևանքով մարդիկ մնացել են առանց լույսի և ջերմության: Չորեքշաբթի Մոսկվան չի մեկնաբանել Կիև քաղաքի ու Կիևի շրջանի վրա հարձակումների մասին լուրերը:

Ժիտոմիրի շրջանային ռազմական վարչակազմի ղեկավար Վիտալի Բունեչկոն, մինչդեռ, զգուշացրել է, որ հնարավոր է անօդաչու սարքերի հարձակումների երկրորդ ալիք։

Ուկրաինան մեղադրում է Իրանին Ռուսաստանին կամիկաձե անօդաչու սարքեր մատակարարելու համար, ինչը Մոսկվան և Թեհրանը հերքում են, թեև Իրանը հայտարարել է, որ պատերազմից «շատ ամիսներ առաջ» ուղարկել է սահմանափակ թվով անօդաչու սարքեր: Դեկտեմբերին լրատվամիջոցները հայտնել էին, որ Ռուսաստանը կարող է համալրել անօդաչու թռչող սարքերի մատակարարումը և վերսկսել հարձակումները դրանց կիրառմամբ, որոնք ընդհատվել էին ուշ աշնանը։

Տաթև Ֆռանգյան