30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Իլհամ Ալիևն ընտանեկան բիզնեսի աշխատակցին նշանակել է պաշտպանության փոխնախարար
Քաղաքականություն
13.12.2022 | 20:31
Ադրբեջանի նախագահ Իլհամ Ալիևը պաշտպանության նոր փոխնախարար է նշանակել։ Ադրբեջանական լրատվականները հայտնում են, որ Ալիևի հրամանագրով՝ պաշտպանության փոխնախարարի պաշտոնում նշանակվել է Ագիլ Գուրբանովը։
Հավելենք, որ ներկայում, ըստ Ադրբեջանի ՊՆ կառուցվածքի, նախատեսված է նախարարի 5 տեղակալի պաշտոն։ Թափուր է մնացել ընդամենը մեկը։
Ուշագրավ է, որ Ագիլ Գուրբանովը զինվորական չէ։ Նա նախկինում աշխատել է «PASHA Investments» ՍՊԸ-ում, որը ներառված է «PASHA Holding»-ի կազմում։ Այն պատկանում է Ադրբեջանի առաջին տիկին ու փոխնախագահ Մեհրիբան Ալիևայի հորը Արիֆ Փաշաևին, բաժնեմասեր ունեն նաև նախագահ Ալիևի դուստրերը՝ Լեյլա և Արզու Ալիևաները։
Գուրբանովը զբաղեցրել է նաև «Սումգայիթի տեխնոլոգիական պարկ» ՍՊԸ-ի դիտորդական խորհրդի նախագահի պաշտոնը։ Վերջին շրջանում էլ նա Արցախի գրավյալ Կովսականում Ադրբեջանի նախագահի հատուկ պատվիրակության ներկայացուցիչներից է եղել։
Ի դեպ, 36-ամյա Գուրբանովը մեկ շաբաթից ավելի է՝ զբաղեցնում է այդ պաշտոնը, սակայն այդ մասին նոր է հանրայնացվում։ Այսպիսով, Ադրբեջանի պետական կառույցներում Մեհրիբան Ալիևան իր թիմի անդամներով շարունակում է դիրքերն ավելի ամրապնդել։
Էմմա Չոբանյան
