Քաղաքականություն
13.12.2022 | 13:03
Ադրբեջանն առաջիկա օրերին կարող է ուժեղացնել ռազմական սադրանքները Լեռնային Ղարաբաղում։ Նման կարծիք է հայտնել իրանցի փորձագետ Էհսան Մովախեդիանը ILNA-ին տված հարցազրույցում։ Փորձագետը կարծում է, որ Ադրբեջանի կողմից Լաչինի միջանցքի փակումը Լեռնային Ղարաբաղում ցեղասպանություն իրականացնելու նպատակ է հետապնդում։ Մյուս պատճառը, ըստ Մովախեդիանի, Լաչինի միջանցքում ոսկու հանքավայրերն են։ Նա համոզված է, որ Բաքուն մտադիր է գրավել միջանցքը և այնտեղից դուրս մղել ռուս խաղաղապահներին, որպեսզի բրիտանական ընկերությունները կարողանան շահագործել այդ հանքավայրերը։
«Իրավիճակը ճգնաժամային է։ Անհրաժեշտ է, որպեսզի Իրանը դիվանագիտական մակարդակով ավելի ակտիվ լինի։ Նաև մեր զինվորականները պետք է նախազգուշացնեն Բաքվին տարածաշրջանում արկածախնդրությունից և զգուշացումներ ուղարկեն նրանց։ Մենք պետք է ակտիվացնենք մեր տեղեկատվական գործունեությունը և լուսաբանենք Ադրբեջանի գործողությունները»,- ասել է Մովախեդիանը։
Հիշեցնենք, որ ադրբեջանցիների մի քանի տասնյակ հոգանոց խումբը բնապահպանական կեղծ պատրվակով դեկտեմբերի 12-ի ժամը 10։30-ից փակ է պահում Արցախը Հայաստանին կապող միակ ցամաքային ճանապարհը։
Տաթև Ֆռանգյան
