Չինաստանի իշխանությունները դադարեցնում են քաղաքացիների տեղաշարժի հսկողությունը

Դեկտեմբերի 13-ից Չինաստանի իշխանությունները կդադարեցնեն սմարթֆոնների օգտագործմամբ քաղաքացիների տեղաշարժին հետևող ծրագրի օգտագործումը։ Այս մասին հայտնում է «Սինհուա» պետական լրատվական գործակալությունը։

Աղբյուրի տվյալներով՝ ծրագիրն օգտագործվել է COVID-19-ի տարածումը վերահսկելու համար։ Այնուամենայնիվ, երեքշաբթի օրվանից Չինաստանի կառավարությունը չեղարկել է դրա օգտագործումը:

Ծրագիրը տեղեկատվական երթուղային քարտեզ է՝ կորոնավիրուսի դեմ պայքարի կանխարգելիչ միջոցառումների օպտիմալացման ֆոնին, որը ներդրվել է 2020 թվականին՝ որպես COVID-19-ի կանխարգելման և վերահսկման միջոցառումների մաս։ Այն թույլ է տվել հետևել մարդկանց տեղաշարժին քաղաքում՝ բացահայտելու վիրուսի տարածման հնարավոր ռիսկերը:

Վերջին շրջանում Չինաստանում աստիճանաբար մեղմացվել են կորոնավիրուսի կանխարգելման հետ կապված սահմանափակող միջոցառումները։ Դեկտեմբերի 7-ին իշխանությունները հայտարարեցին լայնածավալ լոքդաունների արգելքի մասին։

Այժմ կորոնավիրուսի տարածման բարձր ռիսկային գոտիներ են սահմանվում ոչ թե տարածքային-վարչական միավորները, այլ շենքերը, բնակարանները, հարկերը և տնային տնտեսությունները։ Ասիմպտոմ վարակվածներն ու թեթև հիվանդություններ ունեցող մարդիկ այժմ կարող են ընտրել տանը ինքնամեկուսացման և կամավոր կենտրոնացված կարանտինային կենտրոնների միջև:

Չինաստանի իշխանությունները չեղարկել են նաև պարտադիր կանոնավոր PCR թեստավորումը նրանց համար, ում աշխատանքը կապված չէ վարակի բարձր ռիսկի հետ կամ չի ներառում շփում երեխաների կամ տարեցների հետ:

Տաթև Ֆռանգյան