21.03.2026 | 20:02
ԱՄՆ-ի Հավայի նահանգում 5,5 հազար մարդ կտարհանվի ջրհեղեղի պատճառով
Ծայրահեղականները ցանկանում էին սպանել Շոլցին. NYT-ը Գերմանիայում անհաջող հեղաշրջման փորձի մանրամասներ է բացահայտել
Քաղաքականություն
09.12.2022 | 14:26
Գերմանիայում ծայրահեղական «Ռեյխի քաղաքացիներ» շարժման ապստամբները ծրագրել էին սպանել Գերմանիայի կանցլեր Օլաֆ Շոլցին։ Ծայրահեղական շարժման հետևորդները հերքում են ԳԴՀ-ի օրինականությունը և կոչ անում տապալել դաշնային ինստիտուտները։
Դեկտեմբերի 7-ին ձերբակալվել են գերմանացի աջ ծայրահեղական Reichsbürger կազմակերպության ապստամբները: Բացի Շոլցին սպանելուց՝ նրանք ծրագրում էին դադարեցնել էլեկտրաէներգիայի մատակարարումը երկրում և արագ ստեղծել իրենց զինված ուժերը։
The New York Times-ը, վկայակոչելով գերմանական դատախազության աղբյուրները, հայտնում է, որ դավադիրները ցանկացել են սպանել կամ արտաքսել գերմանացի ևս 17 բարձրաստիճան քաղաքական գործիչների, հիմնականում՝ օրենսդիրների։
Արմատականները նույնիսկ ծրագրում էին 71-ամյա արքայազն Հենրի XIII-ին, այսպես կոչված, նոր խորհրդի ղեկավար նշանակել։ Վերջինը պնդում է, որ պատկանում է ազնվական Ռոյս ընտանիքին։ Նրա ծրագիրն էր՝ գրավել Գերմանիան, այն վերածել միապետության և տիրել գահին:
Հաղորդվում է, որ ավելի քան հիսուն կասկածյալներից մի քանիսը զինված են եղել: Ոստիկանության գործողությունների ժամանակ առգրավվել է 50 միավոր զենք՝ արբալետներ, հրացաններ, ատրճանակներ, պարկուճներ և մարտավարական բաճկոններ։
Ոստիկանությունը խմբին սկսել է հետևել գարնանից։ Գերմանացի իրավապահները պնդում են, որ ապստամբները գնել են արբանյակային հեռախոսներ, որոնք ցանկանում էին օգտագործել երկրի էլեկտրամատակարարման և հեռահաղորդակցության ցանցի անջատումից հետո։
Կանաչների կուսակցության պատգամավոր Սառա Նանին հայտարարել է, որ թեև արմատականների հեղաշրջման փորձը հիմար էր, բայց և՝ վտանգավոր:
«Շարունակում են ի հայտ գալ հավելյալ մանրամասներ, որոնք կասկածի տակ են դնում՝ արդյո՞ք այդ մարդիկ բավականաչափ խելացի են եղել նման հեղաշրջում ծրագրելու և իրականացնելու համար: Բայց փաստը մնում է փաստ, որ որքան էլ հիմար լինեն նրանց գաղափարները և անհույս՝ ծրագրերը, նույնիսկ այս փորձը վտանգավոր է»,- հայտարարել է նա։
Տաթև Ֆռանգյան
