Անցյալ տարվա վերջից քննարկվող նախագիծը ինչո՞ւ եք հասցրել այս տարվա վերջին՝ հրատապ ռեժիմով․ Խաչատրյան․ ՏԵՍԱՆՅՈՒԹ

Ազգային ժողովի արտհերթ նիստում հրատապության կարգով քննարկման է ներկայացվել 11 նախագիծ։

ՀՀ արդարադատության նախարարի տեղակալ Արփինե Սարգսյանը հիմնավոորեց քննարկվող նախագծերի հրատապությունը։

Փոխնախարարն առաջարկեց «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին և հարակից օրենքներում փոփոխություններ և լրացումներ նախատեսող օրենքների նախագծերի փաթեթը քննարկել երրորդը՝ «Հայաստանի Հանրապետության և Ասիական զարգացման բանկի միջև 2022 թվականի նոյեմբերի 17-ին ստորագրված «Հարկաբյուջետային կայունության և ֆինանսական շուկաների զարգացման ծրագիր» վարկային համաձայնագիրը վավերացնելու մասին նախագծից և Հայաստանի Հանրապետության և Զարգացման ֆրանսիական գործակալության միջև 2022 թվականի նոյեմբերի 17-ին ստորագրված թիվ CAM 1016 01 վարկային համաձայնագիրը վավերացնելու մասին նախագծից հետո։

«Ես խորապես համոզված եմ, որ ո՛չ ֆրանսիացիների հետ, ո՛չ էլ Ասիական զարգացման բանկի հետ այդ համաձայնագրերը երեկ չեք ստորագրել, որ այսօր առավոտյան եք ներկայացնում Ազգային ժողով։ Կար բավականաչափ երկար ժամանակ։ Ի՞նչն էր պատճառը, որ դուք դա չեք ներկայացրել հերթական նիստերի օրակարգով։

ՆԳՆ ստեղծելու մասին էլ խոսվում էր անցյալ տարի այս օրերին, և 2022թ․ բյուջեի նախագծի մեջ արդեն այդ հարցն արծարծվում էր։ Եկել ենք հասել ենք տարվա վերջին, և հիմա այդ հարցը փորձում ենք բարձրացնել»,- դիմելով Արփինե Սարգսյանին՝ այս մասին նշեց «Հայաստան» խմբակցության պատգամավոր Արթուր Խաչատրյանը։

Փոխնախարարը պատասխանեց՝ հայտնելով, որ համաձայնագրերը ստորագրվել են 2022 նոյեմբերի 17-ին․ «Հետևաբար այլընտրանք չկար այլ օրակարգով հարցը ներկայացնելու»։

Ինչ վերաբերում է ՆԳՆ-ին, փոխնախարարը նշեց, որ դրա վերաբերյալ քննարկումները սկսվել են նախանցյալ տարի, սկզբնական փուլում այլ մոդել է նախատեսվել, այս տարի նոր մոդել է ներկայացվում, մինչ այդ ներառական քննարկում է իրականացվել։

Մանրամասները՝ տեսանյութում։