Իտալիայում անհետացել է ռուս օլիգարխի կալանված զբոսանավը

Իտալական Սարդինիայում կալանված ռուս օլիգարխի զբոսանավն անհետացել է նավահանգստից. 22 մետրանոց նավը, որը պատկանում է միլիարդատեր Դմիտրի Մազեպինին, վերջին անգամ տեսել են իտալական կղզում ամռանը, գրում է The Guardian-ը։

Ռուս օլիգարխին պատկանող շքեղ զբոսանավը, որը կալանվել էր ԵՄ պատժամիջոցների պատճառով, առեղծվածային կերպով այս ամռանն անհետացել է իտալական Սարդինիա կղզու նավահանգստից: Aldabra-ն պատկանում է միլիարդատեր Դմիտրի Մազեպինին՝ հանքային պարարտանյութ արտադրող ընկերության սեփականատիրոջն և Ֆորմուլա 1-ի նախկին ավտոարշավորդ Նիկիտա Մազեպինի հորը։

Պարբերականը հայտնում է, որ 700 հազարից մինչև 1 միլիոն եվրո գնահատվող նավը խարսխված է եղել Օլբիա նավահանգստում և ձերբակալվել է մարտին, երբ Մազեպինը ներառվել է պատժամիջոցների ցուցակում Ուկրաինա ռուսական ներխուժման մեկնարկից մի քանի շաբաթ անց։ Նավն այնտեղ մնացել է մինչև հունիս և անհետացել մի քանի ժամ առաջ այն բանից, երբ պաշտոնապես հաստատվել է, որ այն պատկանում է Մազեպինին:

Ոստիկանությունը հայտնել է, որ Մազեպինը վարձել է արտասահմանյան ընկերություն, որն իր հերթին վարձել է սարդինացի նավապետի՝ զբոսանավը Իտալիայից տեղափոխելու համար: Ճանապարհորդության կազմակերպման մեջ ներգրավված Մազեպինը, ընկերությունը և նավապետը, որը պնդում է, որ չգիտեր, որ նավը պատկանում է ռուս օլիգարխին, կտուգանվեն մինչև 500 հազար եվրո՝ նավը Իտալիայից անօրինական դուրս բերելու համար։

Սա Իտալիայում առաջին դեպքն է, երբ երկրում սառեցված ակտիվներ ունեցող ռուսաստանցուն հաջողվել է խուսափել ԵՄ պատժամիջոցներից։

Հավելենք, որ Ռուսաստանի կողմից Ուկրաինա լայնամասշտաբ ներխուժման մեկնարկից հետո Իտալիայում կալանք է դրվել նաև առանձնատան վրա, որը պատկանում է Դմիտրի Մազեպինին և նրա ավտոմրցարշավորդ որդուն։

Տաթև Ֆռանգյան