Ռումինիայի և Բուլղարիայի` Շենգենյան գոտուն միանալու դիմումները մերժվել են

ԵՄ Ներքին գործերի և արդարադատության խորհուրդը հրաժարվել է աջակցել Բուլղարիայի և Ռումինիայի՝ Շենգենյան տարածք մուտք գործելու մասին որոշմանը։ BTV-ի փոխանցմամբ՝ ԵՄ 27 նախարարներից 25-ը քվեարկել է բալկանյան երկրների՝ Շենգենյան գոտուն միանալու օգտին, իսկ Ավստրիայի և Նիդեռլանդների ներկայացուցիչները դեմ են արտահայտվել, գրում է ՏԱՍՍ-ը։

Միաժամանակ, ԵՄ երկրները պաշտոնապես հավանություն են տվել Շենգենյան գոտուն Խորվաթիայի միանալուն։

Բուլղարիայի փոխվարչապետ և տեխնիկական կառավարության ներքին գործերի նախարար Իվան Դեմերջիևը, մեկնաբանելով խորհրդի որոշումը, այն անվանել է քաղաքական, սակայն պատրաստակամություն է հայտնել շարունակել աշխատանքը երկրի՝ Շենգենյան գոտուն միանալու ուղղությամբ։

«Ներկայացված զեկույցները հստակ ցույց տվեցին, որ Բուլղարիան և Ռումինիան համապատասխանում են Շենգենյան բոլոր չափանիշներին: Բայց հարցը քաղաքական էր, 25 պետություններ աջակցեցին մեզ, բայց երկու տերություններ (Ավստրիան և Նիդեռլանդները) կայացրին իրենց հատուկ որոշումը»,- ասել է նա:

Դեմերջիևի խոսքով՝ երկրի իշխանությունները «դրական են տրամադրված», միտված են շարունակելու բանակցությունները և «պատրաստ են կառուցողական լուծումների»։ Միաժամանակ, նա ափսոսանք է հայտնել Նիդեռլանդների հետ «դժվար երկխոսության» համար Շենգենյան գոտուն միանալու հարցի շուրջ։