13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
ԵՄ-ն 2 մլրդ եվրո է հատկացնելու Ադրբեջանին տնտեսության զարգացման համար
Քաղաքականություն
08.12.2022 | 20:07
Եվրամիությունը մինչև 2 միլիարդ եվրո է հատկացնելու Ադրբեջանին՝ տնտեսության հետագա դիվերսիֆիկացման, աշխատատեղերի ստեղծման և գյուղական համայնքների ներառական զարգացման համար։ Այս մասին ադրբեջանական «Թուրան» գործակալությանը հայտնել են Բաքվում ԵՄ ներկայացուցչությունից։
«Այսօր սկսել է գործել ԵՄ տնտեսական ներդրումային պլանի բարձր մակարդակի աշխատանքային խումբը։ Նոր համակարգող մարմինը Եվրոպական ներդրումային բանկի (EIB), Վերակառուցման և զարգացման եվրոպական բանկի (EBRD), ինչպես նաև ԵՄ անդամ երկրների ֆինանսական հաստատությունների հետ միասին կբացահայտի և կուղղորդի առաջնահերթ ներդրումները «Եվրոպայի թիմի» ոգով։ Դա կօգնի առավելագույնի հասցնել Ադրբեջանի տնտեսական և ներդրումային ծրագրի ներուժը՝ երկիր ներգրավելու համար մինչև 2 միլիարդ եվրոյի ներդրումներ»,- ասվում է հաղորդագրության մեջ։
Աշխատանքային խումբը պարբերաբար հանդիպելու է Եվրահանձնաժողովի, Ադրբեջանի կառավարության և Եվրոպական ֆինանսական հաստատությունների հետ՝ բացահայտելու և համատեղ իրականացնելու առաջնահերթ ներդրումային նախագծերը, ուսումնասիրելու ներդրումների հնարավորությունները վերականգնվող էներգիայի, կապի, փոքր ու միջին բիզնեսի, թվային ու կանաչ տեխնոլոգիաների անցման ոլորտում։
Եվրոպական հանձնաժողովի Արևելյան հարևանության և ինստիտուցիոնալ զարգացման բաժնի տնօրեն Լոուրենս Մերեդիթն ասել է, որ աշխատանքային խմբի գործարկումը հանդիաանում է ԵՄ-ի և Ադրբեջանի սերտ գործընկերության ևս մեկ վառ ցուցիչը։
«Այսպիսով, Գյանջայի փողոցների լուսավորության բարելավման և փոքր բիզնեսի ֆինանսավորման համար Ադրբեջանին արդեն հատկացվել է մինչև 90 միլիոն եվրո։ Աշխատանքային խմբի մեկնարկի հետ մենք կարող ենք ապահովել, որ Ադրբեջանն ու նրա ժողովուրդն ավելի օգուտ ստանան ներդրումային ներուժից»,- ասվում է հաղորդագրության մեջ։
Պարզ չէ, սակայն, թե մարդու իրավունքների խախտումերով, խոսքի ու մամուլի ազատության բացակայությամբ, ավտորիտար ռեժիմով հայտնի Ադրբեջանն ինչի համար է ԵՄ-ից նման շռայլ «նվեր» ստանում։ Հավելենք, որ Արևելյան գործընկերության երկրների շարքում Ադրբեջանը տարբեր վարկանիշներով զբաղեցնում է վերջին հորիզոնականները՝ քաղհասարակության, տնտեսության ազատության, մարդու իրավունքների, խոսքի ազատության ու այլ ոլորտներում որևէ առաջընթաց չգրանցելով։
Հիշեցնենք, որ այն բանից հետո, երբ պարզ դարձավ, որ ԵՄ-ն Հայաստանին 2,6 մլրդ եվրո է տրամադրում, Ադրբեջանի նախագահ Իլհամ Ալիևը պարբերաբար իր դժգոհությունն էր հայտնում՝ նշելով, որ «դա արդար չէ»։
Էմմա Չոբանյան
