21.03.2026 | 20:02
ԱՄՆ-ի Հավայի նահանգում 5,5 հազար մարդ կտարհանվի ջրհեղեղի պատճառով
Թուրքիայում մարդկանց 54,3 տոկոսը կարծում է, որ քաղաքական հայացքների պատճառով խտրականության է ենթարկվում
Քաղաքականություն
07.12.2022 | 23:30
Թուրքիայում մարդկանց 54,3 տոկոսը կարծում է, որ խտրականության է ենթարկվում քաղաքական հայացքների պատճառով։ Այս մասին հայտնում է Ազատության Ստոկհոլմի կենտրոնը՝ վկայակոչելով Հավասար իրավունքների մոնիթորինգի ասոցիացիայի «Թուրքիայում 2022 թվականի նոյեմբերին խտրականության հետազոտությունը», գրում է Turkish Minute-ը։
Ասոցիացիան հարցում է անցկացրել Թուրքիայի 26 նահանգում 1,531 մարդու շրջանում՝ հարց ուղղելով՝ արդյո՞ք նրանք ենթարկվում են խտրականության։ Հարցվածների 25,8 տոկոսն ասել է, որ մշտապես խտրականության է ենթարկվում ազգային պատկանելության պատճառով, 26,5 տոկոսը՝ կրոնական համոզմունքների, 36,6 տոկոսը՝ միգրանտների ինքնության և 54,3 տոկոսը՝ քաղաքական համոզմունքների համար: Գենդերային ինքնությունը խտրականության պատճառ է հանդիսանում հարցվածներից 36,3 տոկոսի համար։
Զեկույցի համաձայն՝ այն ոլորտները կամ հաստատությունները, որտեղ առավել տարածված է խտրականությունը, պետական կառույցներն են՝ 38,3 տոկոսով և մասնավոր հատվածը՝ 34,7 տոկոսով: Դրան հաջորդում են պետական կամ քաղաքային հիմնարկների սոցիալական ծառայությունները՝ 31,5 տոկոսով։
Հարցվածները, որոնք ասել են, որ երբեք խտրականության չեն ենթարկվել կրոնական հաստատություններում, կազմել է 36,3 տոկոս: Հարցին՝ «Ի՞նչ եք կարծում՝ Թուրքիայում գործող օրենքները բավարա՞ր են խտրականությունը կանխելու համար», հարցվածների 10,4 տոկոսը պատասխանել է՝ այո, իսկ 85,7 տոկոսը՝ ոչ։
Հարցման մասնակիցների 65 տոկոսի կարծիքով՝ Թուրքիայում պետական կառույցները բավարար քայլեր կամ համապատասխան միջոցներ չեն ձեռնարկում խտրականությունը կանխելու համար: Ընդհանուր առմամբ, հարցվածների 81,6 տոկոսը կարծում է, որ Թուրքիայում խտրականություն դրսևորող մարդիկ չեն պատժվում իրենց արարքների համար։
Էմմա Չոբանյան
