16.04.2026 | 13:43
Էլինար Վարդանյանին ո՞վ է նամակ գրում՝ Քոչարյանը, թե Ծառուկյանը․ Ռուբինյանը՝ ընդդիմությանը․ ՏԵՍԱՆՅՈՒԹ
Նոր պատերազմի պիտի պատրաստվենք․ Ադրբեջանը սադրանքներով արագ գնում է դրան․ Արմեն Պետրոսյան․ ՏԵՍԱՆՅՈՒԹ
Քաղաքականություն
07.12.2022 | 19:32
Ադրբեջանը մեկը մյուսի հետևից սադրանքների է գնում ոչ միայն Հայաստանի սահմանին, այլև Արցախում։ Մի դեպքը Գետավան համայնքում է եղել՝ հայ երիտասարդներին կռվի մեջ ներքաշելը և վնասվածքներ հասցնելը, երկրորդը՝ Լաչինի միջանցքը փակելու Ադրբեջանի բնապահպանական ակցիան էր։ Դրան գումարած՝ ՌԴ խաղաղապահների հրամանատարը ԼՂ-ում Ադրբեջանի Հանրայինի հետ զրույցում ասել է, թե Ղարաբաղը Հայաստանին կապող ճանապարհի վրա մինի-մաքսակետ կտեղադրվի՝ հագեցած հատուկ սարքավորումներով։ Նա նշել է, որ նման պայմանավորվածություն ձեռք է բերվել ռուսական և ադրբեջանական կողմերի բանակցությունների արդյունքում։ Թեև Արցախի ԱԽ-ն և ԱԱԾ-ն հերքել էին սա, բայց ամեն դեպքում ԼՂ ԱԺ 5 խմբակցությունների ղեկավաները հանդիպել են Վոլկովին և դեմ արտահայտվել միջանցքում ռենտգեն-սքաների տեղադրմանը՝ պահանջելով դա չանել։
Ի՞նչ նպատակի է գնում Ադրբեջանն այս ամենով։ Տարածաշրջանային հարցերով փորձագետ Արմեն Պետրոսյանը Factor TV-ին տված հարցազրույցում այս փաստերին գումարում է նաև Թուրքիայի և Ադրբեջանի համատեղ զորավարժությունները՝ այն ուղերձ համարելով ինչպես Իրանին ուղղված, այնպես էլ Հայաստանին։
«Այդ զորավարժությունների ուղերձն առաջին հերթին, այսպես կոչված, «Զանգեզուրի միջանցքի» խնդրի լուծումն է։ Նրանց ուղերձն է, որ ՀՀ-ն պետք է խելացի գտնվի և այդ ճանապարհը տա, թե չէ հետո ավելի թանկ կարող է արժենալ։ Երկրորդ ուղերձն Իրանին է ուղղված, որ հանկարծ չփորձի խոչընդոտել նրանց։ Հայաստանում ամեն օր նոր պատերազմի սպասելու տրամադրությունը պետք է լինի։ Մենք ամեն օր նոր պատերազմի պիտի պատրաստ լինենք։ Այս պատերազմն ադրբեջանա-թուրքական հաշվարկների հարց է ընդամենը։ Նրանք նստելու են և հաշվարկեն՝ այդ նոր պատերազմում ո՞նց կարողանան իրենց առաջ դրված խնդիրն առավելագույնս լուծել»,- ասաց փորձագետը։
Նշենք, որ Ադրբեջանում էր Թուրքիայի ողջ ռազմական վերնախավը՝ ՊՆ ղեկավար Հուլուսի Աքարի գլխավորությամբ՝ Ջաբրայիլում, Աստարայում և այլ տարածքներում թուրք-ադրբեջանական զորավարժություններին էին հետևում։ Ինչպես Իրանի՝ ամիսներ առաջվա զորավարժությունը, սա ևս ուներ Արաքսն անցնելու սցենար։ Եթե հիշենք վաղ անցյալը, հատկապես՝ 2020-ի նոյեմբերի 9-ից հետո թուրք-ադրբեջանա-պակիստանյան զորավարժություններ էին անցկացվել, որից հետո Նախիջևանի սահմանին՝ իրանական, ապա էլի՝ թուրք-ադրբեջանական։
Հարցազրույցն ամբողջությամբ՝ տեսանյութում։
Ռոբերտ Անանյան
