30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Ռուսաստանը փորձում է սառեցնել ռազմական գործողությունները՝ ուժերը հավաքելու համար․ Ստոլտենբերգ
Քաղաքականություն
07.12.2022 | 20:09
Ռուսաստանը փորձում է «գոնե կարճ ժամանակով սառեցնել» Ուկրաինայի ռազմադաշտում առկա իրավիճակը՝ վերականգնվելու և գարնանը նոր հարձակում սկսելու համար։ Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը, գրում է BBC-ի ռուսական ծառայությունը։
Նա պատասխանել է քննադատություններին, որ արևմտյան պետությունները հոգնել են շարունակվող պատերազմից։ Ստոլտենբերգի խոսքով՝ ՆԱՏՕ-ն կաջակցի Ուկրաինային ու նրա ինքնպաշտպանությանը։
«Եթե Պուտինը հաղթի, դա ողբերգություն կլինի ուկրաինացիների համար, ինչպես նաև լուրջ հետևանքներ կունենա բոլորիս համար՝ դաշնակիցներին դարձնելով ավելի խոցելի, իսկ աշխարհը՝ ավելի վտանգավոր»,- ասել է Ստոլտենբերգը բրիտանական Financial Times-ի կազմակերպած համաժողովում։
Միաժամանակ, նա չի նշել՝ արդյո՞ք ՆԱՏՕ-ն Ուկրաինային կտրամադրի արևմտյան տանկեր և ինքնաթիռներ, ինչից մինչ օրս ձեռնպահ են մնացել։ Ստոլտենբերգն ասել է, որ հիմա կարևոր է արդեն իսկ փոխանցված զենքերն աշխատանքային վիճակում պահպանել և շարունակել պահեստամասերի ու զինամթերքի մատակարարումը։
«Պարադոքսն այն է, որ որքան շատ ենք մենք ցանկանում հասնել խաղաղ բանակցային լուծման, որը երաշխավորում է Ուկրաինայի հաղթանակը, այնքան ավելի հրատապ ռազմական աջակցություն է անհրաժեշտ Ուկրաինային՝ արդար և կայուն խաղաղության համար պայմաններ ստեղծելու համար»,- ասել է ՆԱՏՕ-ի գլխավոր քարտուղարը։
Նա հավելել է, որ ներկայում խաղաղ բանակցությունների համար պայմաններ չկան։
«Ռուսաստանը բանակցությունների համար պատրաստակամության նշաններ ցույց չի տալիս, և դա Ուկրաինայի ինքնիշխանությունն ու տարածքային ամբողջականությունը հարգելն է։ Դա ՆԱՏՕ-ի կամ Բրյուսելի որոշելիքը չէ, այլ ուկրաինացիների, երբ հասնի բանակցությունները սկսելու ժամանակը»,- ասել է դաշինքի գլխավոր քարտուղարը։
Էմմա Չոբանյան
