30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Արգենտինայի փոխնախագահը դատապարտվել է 6 տարվա ազատազրկման
Քաղաքականություն
07.12.2022 | 15:57
Արգենտինայի փոխնախագահ, նախկին նախագահ Քրիստինա Ֆերնանդես դե Քիրշները դատապարտվել է վեց տարի ժամկետով ազատազրկման և ցմահ զրկվել պետական պաշտոններ զբաղեցնելու իրավունքից, գրում է DW-ի ռուսական ծառայությունը։
Քիրշները դատապարտվել է երեք դատավորներից կազմված կոլեգիայի կողմից այն բանից հետո, երբ մեղավոր է ճանաչել խարդախության սխեմայի մասնակցության համար, որով իշխանությունները պետական ծրագրերից 1 միլիարդ դոլար (956 միլիոն եվրո) են յուրացրել նրա՝ որպես պետության ղեկավար պաշտոնավարման ընթացքում: Միաժամանակ, դատարանը մերժել է հանցավոր կազմակերպություն ղեկավարելու մեղադրանքը․ այս հոդվածով պատիժը կարող էր լինել 12 տարվա ազատազրկում։
AP-ի փոխանցմամբ՝ սա առաջին դեպքն է, երբ Արգենտինայի փոխնախագահը դատապարտվում է պաշտոնավարման ընթացքում։ Վճիռն օրինական ուժի մեջ չի մտնի այնքան ժամանակ, քանի դեռ բողոքները չեն լսվել. գործընթաց, որը կարող է տարիներ տևել։ Այս պահին Արգենտինայի փոխնախագահն ունի քրեական հետապնդումից անձեռնմխելիություն։
Քրիստինա Ֆերնանդես դե Քիրշները քննադատել է դատավճիռը՝ իրեն անվանելով «դատական մաֆիայի» զոհ։ Ավելի ուշ նա հայտարարել է, որ հաջորդ տարի չի առաջադրվելու նախագահի պաշտոնում, որը նա արդեն զբաղեցրել է 2007-2015 թվականներին:
Նախկին նախագահի կողմնակիցները հայտարարել են համազգային գործադուլի հնարավորության մասին։ Նրանք հավաքվել են Բուենոս Այրեսի կենտրոնում ու երթով շարժվել դեպի դաշնային դատարան, որը Քիրշներին մեղավոր է ճանաչել։
Նշենք, որ սեպտեմբերի 1-ին մահափորձ է կատարվել 69-ամյա Քիրշների նկատմամբ։ Դեպքը տեղի է ունեցել Բուենոս Այրեսում՝ Քիրշների տան մոտ։ Երկրի նախագահ Ալբերտո Ֆերնանդեսը հեռուստաուղերձում ասել է, որ ամբոխի մեջ մի տղամարդ ատրճանակն ուղղել է Քիրշների վրա և սեղմել ձգանը, սակայն կրակոց չի հնչել։ Հարձակվողը ձերբակալվել է։
Հավելենք, որ 2018 թվականին Արգենտինայի էկոնոմիկայի նախկին նախարար և նախկին փոխնախագահ Ամադո Բուդուն էլ կոռուպցիայի մեղադրանքով դատապարտվել է 5 տարի 10 ամիս ժամկետովազատազրկման։
Տաթև Ֆռանգյան
