Գերմանիայում զինված հեղաշրջման փորձ է կանխվել․ կա մի քանի տասնյակ ձերբակալված

Գերմանիայում լայնածավալ գործողություն է իրականացվել, այսպես կոչված, «ռեյխսբուրգերների» դեմ՝ աջ արմատական շարժման անդամների, ովքեր պատրաստ են բռնության և չեն ճանաչում ԳԴՀ-ի գոյությունը, գրում է DW-ի ռուսական ծառայությունը։

Գերմանիայի Դաշնային դատախազությունն այսօր առավոտյան հայտնել է, որ առնվազն 25 մարդ է ձերբակալվել աջ ծայրահեղական միջավայրին պատկանելու կասկածանքով։ Գերատեսչության տվյալներով՝ «ռեյխսբուրգերները» ծրագրել էին տապալել երկրում սահմանադրական իշխանությունը։

«Այսօր առավոտից լայնածավալ հակաահաբեկչական գործողություն է իրականացվում, Դաշնային դատախազությունը հետաքննչական գործողություններ է իրականացնում «ռեյխսբուրգերների» միջավայրից ահաբեկչական ցանցի դեմ։ Կասկածներ կան, որ զինված հարձակում է ծրագրվել սահմանադրական իշխանությունների դեմ»,- Twitter-ում գրել է Գերմանիայի արդարադատության նախարար Մարկո Բուշմանը։

Դաշնային դատախազության տվյալներով՝ «ռեյխսբուրգերների» ձերբակալություններն իրականացվել են Արդարադատության դաշնային դատարանի հետաքննող դատավորների կողմից տրված հրամանագրերի հիման վրա։ Բոլոր ձերբակալվածները Գերմանիայի քաղաքացիներ են։ Լրատվամիջոցների տվյալներով՝ խուզարկություններ են իրականացվել մի շարք քաղաքներում, այդ թվում՝ Բեռլինում։

«Ռեյխսբուրգերները» չեն ճանաչում ԳԴՀ-ն և իրենց համարում են «գերմանական ռեյխի» քաղաքացիներ։ Նրանք պատրաստում են գոյություն չունեցող կայսրության այլընտրանքային անձնագրեր և վարորդական վկայականներ: Շարժումը սկիզբ է առել 1980-ական թվականներին։ 2017 թվականին Գերմանիայում այս շարժման ավելի քան 16․000 համախոհ կար։

Տաթև Ֆռանգյան