Ուկրաինական զորքերն առաջ են շարժվում Խարկովի մարզում․ ռուսական բանակին դեռ չի հաջողվել շրջապատել Բախմուտը

Ռազմաճակատում տիրող իրավիճակի մասին իր հերթական զեկույցում Պատերազմի ուսումնասիրման ամերիկյան ինստիտուտը (ISW) գրում է, որ Ուկրաինայի զինված ուժերին հաջողվել է ազատագրել մի քանի բնակավայրեր Խարկովի մարզի մի փոքր հատվածում, որը շարունակում էր մնալ ռուսական բանակի վերահսկողության տակ։

Միևնույն ժամանակ, ռուս զինվորականները, ըստ ISW-ի, որոշ աննշան առաջխաղացում են գրանցել Բախմուտի մերձակայքում, սակայն մինչ այժմ չի հաջողվել հասնել քաղաքը շրջափակելու իրենց առաջնային նպատակին: Ամերիկացի փորձագետները գրում են Լուգանսկի շրջանի Սվատովո քաղաքի մոտ տեղի ունեցած մարտերի մասին։ Այս կարևոր տրանսպորտային հանգույցը դարձել է Ուկրաինայի զինված ուժերի գլխավոր նպատակներից մեկը Խարկովի մարզի ազատագրումից հետո։ Հղում անելով Ուկրաինայի գլխավոր շտաբի տվյալներին՝ ISW-ն հայտնում է, որ ռուս զինվորականները երեք բնակավայրերի մոտ գնդակոծել են ուկրաինական դիրքերը Սվատովոյից մոտ 50 կմ և միջպետական սահմանից 15 կմ հեռավորության վրա, ինչը վկայում է ուկրաինական բանակի որոշակի առաջընթացի մասին։

Ռուսաստանի պաշտպանության նախարարությունը նաև ակամա խոստովանել է, որ ուկրաինացի զինվորականները վերահսկողության տակ են վերցրել Կիսլովկա գյուղը (գտնվում է Սվատովոյից 25 կիլոմետր հեռավորության վրա), քանի որ հայտարարել է, որ այնտեղ հարված է հասցվել Ուկրաինայի զինված ուժերի հրամանատարական կետին, ասվում է զեկույցում։ Ինչ վերաբերում է Բախմուտի մերձակայքում տիրող իրավիճակին, ապա այնտեղ շարունակվում են ամենակատաղի մարտերը։