«Կանսերվի բանկաներով» դիրքեր էին պահում, հիմա ոչ դիրքերը կան, ոչ՝ բանկաները. Արթուր Խաչատրյան․ ՏԵՍԱՆՅՈՒԹ

Ադրբեջանի հերթական էքսպանսիոնիստական, գաղութատիրական դրսևորումն է՝ Արցախը կլանել, Արցախը առանձնացնել Հայաստանից: Այս մասին ԱԺ-ում լրագրողների հետ զրույցում նշեց ԱԺ «Հայաստան» խմբակցության պատգամավոր Արթուր Խաչատրյանը:

«Նրանց այդ քայլը սպասելի էր, երբ իրենք սկսեցին խոսել Լաչինի միջանցքով զենքի տեղափոխման մասին, իբրև թե հայտնաբերվել են 2021 թվականի արտադրության ականներ: Պետք էր սպասել, որ Ադրբեջանը պետք է գնար հերթական սրացման՝ մանավանդ հաշվի առնելով ՀՀ այսօրվա իշխանությունների, մեղմ ասած, կրավորական, իսկ իրականում ձեռքներն Արցախից լվանալու քաղաքականությունը»,- նշեց ընդդիմադիր պատգամավորը։:

Անդրադառնալով հարցին, թե ստեղծված իրավիճակի համար ընդդիմությունը մեղավոր չէ՞, որը խոստանում էր փրկել Արցախը և Հայաստանը՝ Խաչատրյանը պատասխանեց․ «Կարծում եմ՝ Արցախը և Հայաստանը փրկելու պարտականությունը ՀՀ բոլոր քաղաքացիներինն է: Ես վստահեցնում եմ ձեզ, որ եթե քաղաքացիներն օգտագործեին իրենց բոլոր լծակները, եթե հավատային մեր այն հորդորին, որ գնում ենք էլ ավելի վատթար իրավիճակի և միանային, իրավիճակն ավելի լավ կլիներ»:

Պատգամավորը հավաստիացրեց, որ կլինեն նոր փողոցային ակցիաներ․ «Իրավիճակն անհույս չէ, դեռ կարելի է ամեն ինչ փրկել, դրա համար ես մտահոգ քաղաքացիներին կոչ եմ անում աջակցել ընդդիմադիր ուժերին, հավատալ և դուրս գալ փողոց»:

Անդրադառնալով դիտարկմանը, որ հանրությանը հետաքրքրում է, թե նախկինները, երբ խոսում են իրենց պաշտոնավարման շրջանում բանակը զինելուց, նկատի ունեն «կանսերվի բանկանե՞րը», Խաչատրյանը նշեց․ «Չէ, նկատի ունեն «Իսկանդերը» և այն զենքը, որը կրակել է, որովհետև, այն, ինչ Փաշինյանն առել է, մասնավորապես Սու- 30-ներն այդպես էլ պատերազմի ժամանակ չօգտագործվեցին, և իր խոսքով՝ հարյուրավոր միլիոններ արդեն տվել է, բայց զենքը դեռ չի բերվել։ Այսինքն՝ եթե կռվել են, կռվել են այն զենքով, որը նախկիում կար։ Հիմա «կանսերվի բանկա» չկա, դիրք էլ չկա»։

Մանրամասները՝ տեսանյութում։