25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Ալիևը Պուտինի օգնականի հետ «տրանսպորտային միջանցքների» հարցեր է քննարկել
Քաղաքականություն
05.12.2022 | 19:57
Ադրբեջանի նախագահ Իլհամ Ալիևը Բաքվում այսօր ընդունել է ՌԴ նախագահ Վլադիմիր Պուտինի օգնական Իգոր Լևիտինին, հայտնում են ադրբեջանական լրատվականները։
Նշենք, որ Լևիտինը 2004-2012 թվականներին զբաղեցրել է ՌԴ տրանսպորտի նախարարի պաշտոնը։
Հաղորդվում է, որ կողմերը գոհունակություն են հայտնել Ադրբեջանի և Ռուսաստանի միջև երկկողմ հարաբերությունների զարգացման կապակցությամբ, ներառյալ՝ տնտեսական հարաբերություններից, ինչպես նաև նշվել է տրանսպորտի և ենթակառուցվածքների ոլորտում համատեղ աշխատանքի կարևորությունը։
«Զրույցի ընթացքում քննարկվել են երկկողմ և տարածաշրջանային հարցեր, որոնք վերաբերվում են տրանսպորտին, տարանցմանը, լոգիստիկային, այդ թվում՝ Հյուսիս-Հարավ տրանսպորտային միջանցքի ընդլայնման հնարավորությանը, ինչպես նաև «Զանգեզուրի միջանցքի» հետ կապված հարցեր»,- ասվում է ադրբեջանական կողմի տարածած հաղորդագրության մեջ։
Նշենք, որ ուկրաինական պատերազմի ֆոնին ՌԴ-ի համար կենսական կարևորություն է ստացել Ադրբեջանի, ՌԴ-ի և Իրանի միջև Հյուսիս-Հարավ տրանսպորտային միջանցքի զարգացումը։ Սեպտեմբերին կողմերը նաև Ադրբեջանում հանդիպում են անցկացրել այս թեմայով։ Առաջին եռակողմ հանդիպման արդյունքներով ստորագրվել է նաև Բաքվի հռչակագիրը։ Դրա համաձայն՝ կողմերը պատրաստակամություն են հայտնել համագործակցել ենթակառուցվածքների և տրանսպորտային հնարավորությունների գնահատման ու վերլուծության ոլորտում՝ միջանցքի լիարժեք օգտագործման համար։
Բացի այդ, կողմերը հայտարարել են մեկ ամսվա ընթացքում «Ռեշտ-Աստարա» երկաթուղու նախագծի վերաբերյալ համաձայնագրի նախագիծը պատրաստելու մտադրության մասին և սկսել բանակցությունները մինչև 2022 թվականի ավարտը։ Այս մասով, ի դեպ, տեղեկություններ դեռ չկան։
Հիշեցնենք՝ ավելի վաղ ռուսական լրատվամիջոցները հայտնել էին, որ Մոսկվան մինչև 2030 թվականը կարող է 1,5 միլիարդ դոլար հատկացնել «Հյուսիս-Հարավ» միջազգային տրանսպորտային միջանցքի զարգացման համար, որը Ռուսաստանը կապում է Հնդկաստանի հետ Իրանի միջոցով: Նշվում էր, որ «Ռուսական երկաթուղիներ» ընկերությունը մասնակցելու է Ադրբեջանի Աստարա քաղաքից մինչև Իրանի Ռեշտ քաղաք երկաթգծի կառուցմանը և Իրանում Գերմսար-Ինչե-Բուրուն գծի (495 կմ) էլեկտրաֆիկացմանը: Սակայն Իրանի և Ադրբեջանի միջև գերլաված հարաբերությունների պայմաններում դեռ պարզ չէ, թե այս նախագիծն ինչ ընթացք կունենա։
Էմմա Չոբանյան
