Հրապարակի շենքերը վերականգնող բանվորին ասելու են`«կաֆելի կլեյով» անցքերը լցրու ու վերջ. ճարտարապետ․ՏԵՍԱՆՅՈՒԹ

«Այն, ինչ տեղի ունեցավ, անթույլատրելի է, իսկ ամենավատն այն է, որ դա ոչ թե չարամտության, այլ անտարբերության հետևանք էր, պետության կողմից հուշարձանների պահպանության որևէ տեսլական ու գաղափարախոսություն չունենալու հետևանք: Հուշարձաններին անդառնալի վնաս է հասցվել»,- Factor TV-ի հետ զրույցում նման տեսակետ է հայտնում ճարտարապետ, Երևանի ավագանու նախկին անդամ Արսեն Կարապետյանը` անդրադառնալով վերջերս բարձրացած աղմուկին այն բանից հետո, երբ Հանրապետության հրապարակի` հատուկ պահպանվող հուշարձանների ցանկում ներառված թամանյանական շենքերը գայլիկոնով ծակեցին` ամանորյա լույսերը կախելու համար:

Երևանի քաղաքապետարանի այն պարզաբանումը, թե տոնական լուսավորության ենթակառուցվածքի ապամոնտաժումից հետո շենքի արտաքին տեսքն անցքերի լցման միջոցով կվերականգնվի, ճարտարապետին չի բավարարում.

«Խնդիրը ստեղծում են, հետո փորձում են դա լուծել: Վստահ եմ, որ այդ անցքը լցնող բանվորը հուշարձանների վերականգնման գծով որակավորում չի ունենալու: Ուղղակի ասելու են` «կաֆելի կլեյով» անցքերը լցրու ու վերջ: Վերականգնման ցանկացած փորձ ուղղակի խաբեություն է: Ի դեպ, մենք հուշարձանի անհաջող վերականգնման օրինակ արդեն ունենք` Հանրապետության Հրապարակի մետրոյի չակերտավոր վերականգնումը»,-ասում է Արսեն Կարապետյանը: Իսկ քաղաքապետարանի այն հայտարարությանը, թե նախքան նախագծի իրականացումը տեղի է ունեցել աշխատանքային քննարկում ԿԳՄՍ գործընկերների հետ, որոնք նշել են աշխատանքների հետևանքները նվազագույնի հասցնելու կարևորությունը, ճարտարապետն այսպես է մեկնաբանում. «Այս թեմայով չեն կարող լինել բանավոր պայմանավորվածություններ: Կենցաղային պայմանավորվածություն է եղել, եթե ոչ` թող ցույց տան լուսատուների ամրացման նախագիծը. վստահ եմ, որ որևէ փաստաթուղթ չկա: ԿԳՄՍ նախարարության չեզոք կեցվածքն էլ ինձ համար նորություն չէ: Մենք միշտ ուշանալու ենք, և դեպքերի տեղի ունենալուց հետո ենք արձագանք տալու»:

Արսեն Կարապետյանն անդրադառնում է նաև վերջերս տեղի ունեցած Ճարտարապետների պալատի նախագահի ընտրություններին. 111 ձայնով ընտրվեց Ալեքսանդր Բադալյանը, թեկնածուներից մեկն էլ Արսեն Կարապետյանն էր.

«Հույս կա, որ կկարողանանք միասին աշխատել և որակական փոփոխություն բերել պատալի աշխատանքներում: Մենք պետք է սովորենք միասին աշխատել, նույնիսկ եթե համագործակցությունը կոմֆորտ չէ: Կուզեի պալատի հաջորդ նախագահը երիտասարդ լիներ իր մտածողությամբ»:

Մանրամասները` տեսանյութում:

Աննա Բաբաջանյան