Ըստ քաղաքական նպատակահարմարության՝ ԱԺ-ն անձանց բերում դատավոր է դարձնում. Նինա Կարապետյանց․ ՏԵՍԱՆՅՈՒԹ

Ընթանում է «Իրավունքների պաշտպանություն առանց սահմանների» հասարակական կազմակերպության նախաձեռնած «Հակակոռուպցիոն ինստիտուտների ստեղծումը. մշտադիտարկման արդյունքները և խնդիրները» թեմայով հանրային քննարկումը:

Քննարկման ընթացքում ներկայացվեցին կազմակերպության կողմից իրականացված հակակոռուպցիոն մարմինների՝ Հակակոռուպցիոն բոլոր ատյանի դատարանների դատավորների և Հակակոռուպցիոն կոմիտեի ստեղծման և ինքնավար պաշտոն զբաղեցնող անձանց ընտրությունների մշտադիտարկման արդյունքները և վերհանված խնդիրները:

«Ազգային ժողովը դատավորներ է ընտրում այնպիսի մարդկանց, որոնք դատական համակարգում անելիք չունեն»,- այս մասին նշեց «Հելսինկյան Ասոցիացիա» իրավապաշտպան հասարակական կազմակերպության նախագահ Նինա Կարապետյանցը։ Նրա խոսքով՝ ըստ քաղաքական նպատակահարմարության՝ ԱԺ-ն անձանց բերում, դատավոր է դարձնում։
Իրավապաշտպանի դիտարկմամբ՝ իշխանություններն ինչ-որ փուլում հասկանալու են, որ իրենց ստեղծած կառույցները արդյունավետ չեն, և այդ կառույցները պահելն անիմաստ է․ «Երբ որ դատական համակարգում պահում ես այս ճյուղը, որը ոչ մի բանով չի զբաղվում, անիմաստ է դառնում այդ կառույցը պահելը»։

Կարապետյանցի խոսքով՝ հասարակական կազմակերպությունները սեպառատ գործողություններ են իրականացնում՝ փոխանակ իշխանություններից պահանջելու, որ կատարեն իրենց նախընտրական, ինչպես նաև ռազմավարության մեջ նշված խոստումները։

«Երբ որ քաղհասարակությունը մի մարդու նման կկանգնի և իշխանություններից կպահանջի կատարել խոստումները, այդ ժամանակ հնարավոր է ինչ-որ պատասխան ստանալ։ Քանի դեռ համակերպվում ենք ու «դաբրոներ» ենք տալիս իշխանություններին, հետևանքը սա է լինելու։
Այն, որ Մնացական Մարտիրոսյանի նման մարդու մտքով անցել է, որ դիմի և համոզված լինի, որ թեև քննադատվելու է, բայց միևնույն է, անցնելու է, դա է խայտառակությունը։
ԲԴԽ-ում մինչև այսօր կան մարդիկ, որոնք այնտեղ անելիք չունեն, լյուստրացիայի, վեթինգի պայմաններում նրանք առհասարակ դատական համակարգում չպետք է լինեին»,- նշեց իրավապաշտպանը։

Մանրամասները՝ տեսանյութում։