09.10.2026 | 19:28
ՄԱԿ-ը «մտահոգությամբ» է հետևում Ֆրանսիայում դպրոցական բողոքի ցույցերի ընթացքում բռնություններին
Կնոջ ցավն ու ուժը՝ նկարներում․«World Press Photo»-ի մրցանակակիրների ցուցահանդեսն Էջմիածնում է․ՏԵՍԱՆՅՈՒԹ
Հասարակություն
01.12.2022 | 17:45
«Դիմացկունություն. կանանց պատմություններ» խորագրով ցուցահանդեսում, որը բացվեց նոյեմբերի 30-ին Էջմիածնի Մշակույթի տանը, ներկայացված են սեքսիզմի, սեռական բռնության, վերարտադրողական իրավունքների և հավասար հնարավորությունների հասանելիության մասին պատմություններ: «World Press Photo» հիմնադրամը և Նիդերլանդների Թագավորությունը ներկայացնում են 2000-ից 2021 թվականներին «World Press Photo» մրցույթի մրցանակակիր ֆոտոպատմությունների ընտրանի`ցուցահանդես, որը ներկայացնում է աշխարհում կանանց, աղջիկների առջև ծառացող մարտահրավերներն ու դրանց դիմակայելու կարողությունը:
«Նոյեմբերի 25-ից մենք նախաձեռնել ենք գենդերային բռնության դեմ համաշխարհային քարոզարշավ: Ահա թե ինչու մտածեցինք, որ լավ հնարավորություն է այս առանձնահատուկ լուսանկարչական ցուցահանդեսը բերելու նաև Հայաստան: Այս խնդիրը միայն Հայաստանում չէ. սա համաշխարհային խնդիր է: Սեռով պայմանավորված բռնության դեպքեր մենք տեսնում ենք ամբողջ աշխարհում, այդ թվում նաև`Նիդերլանդներում և Հայաստանում: Հետևաբար որոշեցինք Հայաստանի կանանց և տղամարդկանց մեր աջակցությունը հայտնել այս երևույթի դեմ պայքարում, և ցուցահանդեսը բերեցինք Էջմիածին»,- շեշտում է Հայաստանում Նիդերլանդների արտակարգ և լիազոր դեսպան Նիկոլաս Յակոբ Սխերմերսը։
Էջմիածնի քաղաքապետ Դիանա Գասպարյանի խոսքով` հատկանշական է, որ նման թեմատիկայով ցուցահանդեսը բացվեց հենց Էջմիածնում, քանի որ հենց այստեղ է ընտրվել Հայաստանի առաջին կին քաղաքապետը։ Այս պատմությունները փաստագրել են 13 ազգությունների 17 լուսանկարիչներ: Դրանք բացահայտում են, թե ինչ դրսևորումներ ունեն գենդերային խնդիրները 21-րդ դարում: «Ցուցահանդեսը կարևոր է այնքանով, որ աշխարհում կանանց հանդեպ բռնություններին վերջ դրվի: Ոչ բոլոր երկրների մասին նման դեպքերի վերաբերյալ տեղեկություն ունենք»,-ասում է ցուցահանդեսի այցելու Գևորգ Ղազարյանը։ Ցուցահանդեսում ներկայացվում են նաև ֆոտոլրագրության զարգացման ուղիներն ու եղանակները: Կազմակերպիչները հույս ունեն լուսանկարների ու դրանց պատմությունների շնորհիվ հանրության շրջանում ձևավորել փոխըմբռնման մթնոլորտ: Ցուցահանդեսը բաց կլինի մինչև դեկտեմբերի 13-ը:
Մանրամասները՝ տեսանյութում։
Աննա Բաբաջանյան
