ԵՄ-ում առաջարկել են ստեղծել մասնագիտացված տրիբունալ՝ քրեական պատասխանատվության ենթարկելու ռուս պաշտոնյաներին

Անցյալ չորեքշաբթի Եվրահանձնաժողովի նախագահ Ուրսուլա ֆոն դեր Լեյենը առաջ է քաշել «մասնագիտացված դատարանի» ստեղծման գաղափարը՝ Ռուսաստանի բարձրաստիճան պաշտոնյաներին Ուկրաինայի պատերազմի համար պատասխանատվության ենթարկելու համար, գրում է VOA-ն։

Ուրսուլա ֆոն դեր Լեյենն առաջարկել է ստեղծել մասնագիտացված տրիբունալ՝ քրեական պատասխանատվության ենթարկելու այն ռուս պաշտոնյաներին, որոնք ներգրավված են եղել զինված հակամարտության բռնկման մեջ, ինչի հետևանքով զոհվել են տասնյակ հազարավոր մարդիկ, իսկ միլիոնավոր մարդիկ ստիպված են եղել լքել իրենց տները:

«Շարունակելով աջակցել Միջազգային քրեական դատարանի գործողություններին՝ մենք առաջարկում ենք ՄԱԿ-ի աջակցությամբ ստեղծել մասնագիտացված դատարան՝ Ռուսաստանի Դաշնության ագրեսիան հետաքննելու և հետապնդելու համար», – ասել է նա:

Ուկրաինայի նախագահի աշխատակազմի ղեկավար Անդրեյ Երմակը ողջունել է գաղափարը՝ նշելով. «Ռուսաստանը կվճարի հանցագործությունների և ավերածությունների համար»։ Սակայն այս նախաձեռնությունն արդեն իսկ բախվել է իրավական և քաղաքական լուրջ խոչընդոտների։
Հիմնական խնդիրն այն է, որ Միջազգային քրեական դատարանը (ՄՔԴ) իրավասություն չունի Ռուսաստանի նկատմամբ, քանի որ Մոսկվան այս դատարանին մասնակցելու պայմանագիր չի ստորագրել։ Այսպիսով, այս տրիբունալը կարող է քննել միայն Ուկրաինայում կատարված ռազմական հանցագործությունների և մարդկության դեմ հանցագործությունների կոնկրետ դեպքեր։

Այնուամենայնիվ, Ռուսաստանի նախագահ Վլադիմիր Պուտինը,  վարչապետը և արտգործնախարարը անձեռնմխելի են քրեական հետապնդման իմաստով, քանի դեռ պաշտոնավարում են: Միջազգային քրեական դատարանը (ՄՔԴ) Ռուսաստանին ուկրաինական պատերազմի համար պատասխանատվության ենթարկելու միակ ճանապարհը ՄԱԿ-ի Անվտանգության խորհրդից այդ մասին որոշում ստանալն է, ինչը անհնար է, քանի որ Խորհրդի մշտական անդամ Ռուսաստանը, վետո կդնի դրա վրա։