Ես այստեղ պաշտպանելու եմ պառլամենտական համակարգի պահպանումը. Էդմոն Մարուքյան․ ՏԵՍԱՆՅՈՒԹ

ՀՀ-ն կիսանախագահական կառավարման համակարգից վերջնական խորհրդարանական համակարգի չի անցել: Այս մասին այսօր Սահմանադրական բարեփոխումների հանձնաժողովի նիստում հայտարարեց ՀՀ հատուկ հանձնարարարություններով դեսպան, «Լուսավոր Հայաստան» կուսակցության ղեկավար Էդմոն Մարուքյանը:

«Եվ հիմա քննարկում ենք, թե արդյոք ճիշտ է հետ գնալ կիսանախագահական կամ նախագահական համակարգին, երբ դեռ ամբողջությամբ չենք էլ իրացրել խորհրդարանական համակարգի մոդելը: Այդ իմաստով, քանի որ ես այստեղ ներկայացնում եմ նաև «Լուսավոր Հայաստան» կուսակցությունը ուզում եմ ասել, որ մեր դիրքորոշումը միշտ այն է եղել, որ մենք եվրոպական մոդելի պետության ջատագով ուժ ենք և միշտ ասել ենք, որ խորհրդարանական կառավարումը կարող է մեր պարագայում լավ օրինակ լինել ժողովրդավարության իմաստով ներառական կառավարման համակարգ ունենալու իմաստով, և այդ համակարգում որևէ ուժի չմարգինալացնելու, «հաղթողին ամեն ինչ, պարտվողին ոչինչ» սկզբունքը մերժելով՝ փորձել համախմբել երկրի բոլոր կարող ուժերը:

Պետք է խորհրդարանական կառավարումն ամբողջացնել և այն թերությունները, որոնք նպատակային թողնվել են գործող Սահմանադրության մեջ, որ խորհրդարանը լինի հնարավորինս անատամ, հնարավորություն չլինի հակակշիռների, փոխզսպումների մեխանիզմների, դա փոխել, շտկել և ունենալ ռեալ գործող խորհրդարանական համակարգ: Այդ իմաստով, ես այստեղ պաշտպանելու եմ պառլամենտական համակարգի պահպանումը»,- ընդգծեց Մարուքյանը:

Մանրամասները՝ տեսանյութում։