Ազդարարման նոր տեսակ կստեղծվի․ ԶԼՄ-ների հրապարակումները ևս վարույթ հարուցելու հիմք կդառնան․ նախագիծ․ ՏԵՍԱՆՅՈՒԹ

ԱԺ պետական-իրավական հարցերի մշտական հանձնաժողովի նոյեմբերի 30-ի նիստում, ի թիվս այլ նախագծերի, երկրորդ ընթերցմամբ քննարկվեց «Ազդարարման համակարգի մասին» օրենքում և հարակից օրենքներում առաջարկվող փոփոխություններ և լրացումներ կատարելու մասին նախագիծը:
ՀՀ արդարադատության նախարարի տեղակալ Արփինե Սարգսյանը հիշեցրեց, որ նախաձեռնությունն ուղղված է ազդարարման համակարգի կատարելագործմանը:

Փոխնախարարը շեշտեց, որ նախատեսվում է երկու առանցքային փոփոխություն իրականացնել․ առաջարկվում է նաև Մարդու իրավունքների պաշտպանին սահմանել իրավասու մարմին, որը կհավաքագրի պետական մարմինների կողմից ստացված վիճակագրությունը, որը կհրապարակվի azdararir.am կայքում: ՄԻՊ-ն ազդարարների պաշտպանությունը պատշաճ կազմակերպելու գործիքակազմ կունենա: Քրեադատավարական օրենսգրքի տրամաբանության շրջանակում պաշտպանը վարույթն իրականացնող մարմնին կարող է դիմել՝ ազդարարին համապատասխան պաշտպանության միջոց տրամադրելու նպատակով քայլեր ձեռնարկելու համար:

Նախատեսվում է նաև ստեղծել ազդարարման նոր տեսակ՝ «ազդարարում հանրությանը», որը նպատակ ունի կոռուպցիայի դեմ պայքարի համար ստեղծել գործուն մեխանիզմներ:

Կառավարությունն առաջինից երկրորդ ընթերցման ռեժիմում մի քանի առաջարկներ է ներկայացրել:

«Ազդարարում հանրության» հասկացությունը Կառավարությունն առաջարկում է խմբագրել հետևյալ բովանդակությամբ՝ հանրությանն ազդարարում են համարվում կոռուպցիոն բնույթի դեպքի կամ շահերի բախման կամ վարքագծի կանոնների կամ անհամատեղելիության պահանջների կամ այլ սահմանափակումների կամ հայտարարագրման հետ կապված խախտման վերաբերյալ ԶԼՄ-ներում տեղ գտած հրապարակումները, որոնք Քրեական դատավարության օրենսգրքի և «Կոռուպցիայի կանխարգելման հանձնաժողովի մասին» օրենքի համաձայն՝ համապատասխան վարույթ նախաձեռնելու առիթ կամ հիմք կարող են հանդիսանալ:

Մանրամասները՝ տեսանյութում։