«Կանազ»-ի հոսպիտալում հակացուցված է գերությունից վերադարձած զինծառայողների բուժումը. Ժաննա Ալեքսանյան․ ՏԵՍԱՆՅՈՒԹ

««Կանազ»-ի հոսպիտալում զինվորների նկատմամբ վերաբերմունքը անմարդկային է։ Այնտեղ հակացուցված է գերությունից վերադարձած զինծառայողների բուժումը»,- «Գերությունից վերադարձած զինվորները նորից զորակոչվում են. ծանր պատմություններ» թեմայով քննարկման ժամանակ այս մասին հայտարարեց «Լրագրողներ հանուն մարդու իրավունքների» ՀԿ նախագահ Ժաննա Ալեքսանյանը։

«Ամբողջ պատասխանատվությունը դրված է ժամկետային զինծառայողների վրա, հրամանատարական կազմը որևէ պատասխանատվություն չի կրում։ Ինչպես 44-օրյա պատերազմի ժամանակ էին հրամանատարները փախել-չքվել, այնպես էլ սեպտեմբերյան իրադարձությունների ժամանակ»,- նշեց Ժաննա Ալեքսանյանը։

Իրավապաշտպանի խոսքով՝ գերեվարությունից վերադարձած զինծառայողները չպետք է «Կանազի» հոսպիտալում լինեն, այլ պետք է բուժում ստանան ոչ զինվորական բուժհաստատությունում, որտեղ կարժանանան լավ վերաբերմունքի։

«Թող պաշտպանության նախարարն այցելեր այդ զինծառայողներին, «չիները» չէին ընկնի, թող տեսներ՝ ինչ վիճակում են ու մի խոսք ասեր կամ լսեր նրանց, թե ինչ պայմաններում են։ Մեր զինվորների գերության մեջ հայտնվելու ամբողջ մեղքը պաշտպանության նախարարության ուսերին է։

«Կանազում» բժիշկների կողմից շատ վատ վերաբերմունք է դրսևորվում գերությունից վերադարձած տղաների նկատմամբ։ Եթե ռազմական ոստիկանությունում ասել էին՝ մի նռնակ չունեի՞ք ձեզ պայթեցնեիք, հոսպիտալում էլ ասել են՝ դուք ձեզ ավելի լավ է գնդակահարեիք։ Ինչպե՞ս կարելի է դա հանդուրժել։

Եվ դա այն դեպքում, երբ որ մահվան եզրից փրկված զինծառայողներ են այնտեղ, և որևէ բուժում չեն ստանում։
Մի օրինակ նշեմ, այդ տղաներից մեկի մասին, որը շատ ծանր վիճակում է, պատմում են, որ նա հերոս է, ամբողջ դիրքի ոգին է եղել ու կռվել է քաջաբար, ու հիմա նրա արածի համար ոչ մի դրական վերաբերմունք չկա, այլ հակառակը՝ բռի և անմարդկային վերաբերմունքի է արժանանում,- նշեց Ալեքսանյանը՝ ևս մեկ անգամ ընդգծելով՝ գերությունից վերադարձած զինվորներին պետք է տանել այնպիսի բուժհաստատություն, որտեղ նրանք իսկապես կարող են վերականգնվել։

Մանրամասները՝ տեսանյութում։