Պետբյուջեից՝ սեփական գրպանը․ Ալիևը կրթության ոլորտի գումարները կհատկացնի ընտանիքի անդամների ղեկավարած բուհերին

Ադրբեջանում վերջին օրերին քննարկվող թեմաներից մեկն այն է, թե ինչպես է նախագահ Իլհամ Ալիևը որոշել  պետական բյուջեի գումարներն ուղղել սեփական ընտանիքի անդամների գրպանները։ Լրատվամիջոցները հայտնում են, որ 2023 թվականին բարձրագույն կրթությանը հատկացվելիք միջոցների 95 տոկոսը տրամադրվելու է այն բարձրագույն ուսումնական հաստատություններին, որոնց ռեկտորները Ադրբեջանի նախագահ Իլհամ Ալիևի կնոջ՝ Մեհրիբան Ալիևայի հարազատներն են։ Նշվում է, որ 2023 թվականին Ադրբեջանի պետական ​​բյուջեով նախատեսվում է 70 մլն մանաթ հատկացնել բարձրագույն կրթությանը օգնելու համար։ Եվ այդ գումարի մեծ մասը տրամադրվելու է Փաշաև ազգանունով անձանց ղեկավարած հաստատություններին։

Այսպիսով՝ 24 մլն 826 հազար 479 մանաթ հատկացվելու է Ադրբեջանի դիվանագիտական ակադեմիային, որի ռեկտորն է առաջին փոխնախագահ Մեհրիբան Ալիևայի հորեղբայրը՝ Հաֆիզ Փաշաևը։ Մեհրիբան Ալիևայի հոր՝ Արիֆ Փաշաևի ղեկավարած Ազգային ավիացիոն ակադեմիային հատկացվել է 21 մլն 240 հազար մանաթ։ 13 մլն 98 հազար 100 մանաթ կտրամադրվի Լոմոնոսովի անվան Մոսկվայի պետական ​​համալսարանի Բաքվի մասնաճյուղին, որի ռեկտորն է Նարգիզ Փաշաևան՝ Ալիևայի քույրը։ 7 մլն 742 հազար 452 մանաթ է հատկացվում Սեչենովի անվան Մոսկվայի առաջին պետական ​​բժշկական համալսարանի Բաքվի մասնաճյուղին, որի ռեկտորն է Իլհամ Ալիևի հորեղբոր՝ Ջամիլ Ալիևի որդին՝ Ազիզ Ալիևը։

Ստացվում է՝ 2023 թվականին Ադրբեջանի պետական ​​բյուջեից բարձրագույն կրթության զարգացմանը հատկացվող միջոցների 95 տոկոսը կտրամադրվի իշխող ընտանիքի անդամների կողմից կառավարվող հաստատություններին։ Դրանցից երկուսն էլ ուղղակիորեն կապված են Ռուսաստանի Դաշնության հետ։

Բացի այդ՝ Մեհրիբան Ալիևան շարունակում է ամրապնդել իր դիրքերը իշխանական հիերարխիայում։ Մասնավորապես, նոյեմբերի 24-ին նրա օգնական Անդրեյ Սիպիլինը ազատվել էր պաշտոնից ու նշանակվել Իլհամ Ալիևի օգնական, նախագահի աշխատակազմի ռազմատեխնիկական աջակցության հարցերով վարչության պետ։ Դրանից օրեր առաջ Մեհրիբան Ալիևայի մեկ այլ օգնական՝ Խալիդ Ահադովը, նշանակվել էր Իլհամ Ալիևի սոցիալ-տնտեսական հարցերով օգնական։

Էմմա Չոբանյան