Խոշտանգո՞ւմ, թե՞ խուլիգանություն. մի խումբ պարեկների կողմից ենթադրյալ ծեծի փաստով քննություններ են իրականացվում

Նոյեմբերի 26-ին Ազգային ժողովի «Հայաստան» խմբակցության պատգամավոր, ՀՅԴ-ական Քրիստինե Վարդանյանը ֆեյսբուքյան էջում գրել էր, որ ահազանգ է ստացել Լոռու մարզի բնակիչներից առ այն, որ նոյեմբերի 25-ին մի քանի քաղաքացիներ դաժան ծեծի են ենթարկվել Պարեկային ծառայության աշխատակիցների կողմից:

«Ըստ քաղաքացու, ում հետ զրուցեցի քիչ առաջ, միջադեպը տեղի է ունեցել այն բանից հետո, երբ Պարեկային ծառայությունը փորձել է ճանապարհն ազատել Նիկոլ Փաշինյանի շարասյան համար և այդ ընթացքում վեճի է բռնվել տարեց քաղաքացու հետ, ով պարզապես խնդրել է իր հետ հարգանքով խոսել: Խոսակցությանը միջամտել է տարեց քաղաքացու տղան, որից հետո միջադեպին միջամտել են ավելի մեծ թվով Պարեկային ծառայության աշխատակիցներ (մեկ տասնյակից ավել), ովքեր, ըստ քաղաքացու, դաժան բռնություն են կիրառել քաղաքացիական անձանց նկատմամբ` օգտագործելով նաև արցունքաբեր գազ:

Բռնության հետևանքով 2 քաղաքացի` այդ թվում նաև տարեց քաղաքացու անչափահաս թոռը բազմաթիվ վնասվածքներով, այդ թվում նաև կոտրվածքներով հայտնվել են հիվանդանոցում»,- գրել էր պատգամավորը:

Նա նաև նշել էր, որ ըստ քաղաքացու, շաբաթ օրը ոչնչացվել են նաև միջադեպը տեսագրած տեսախցիկների նյութերը, իսկ իրենց հորդորել են որևէ կերպ չբարձրաձայնել դեպքի մասին:

Միջադեպի առթիվ ոստիկանության ներքին անվտանգության վարչությունում արդեն իսկ ծառայողական քննություն է նշանակվել։ Այս մասին Factor.am-ի հետ զրույցում ասաց Ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը։

Գլխավոր դատախազությունից էլ հայտնեցին, որ քրեական 2 վարույթ է նախաձեռնվել։ Ինչպես Factor.am-ին տեղեկացրեց Գլխավոր դատախազի խորհրդական Լուսինե Մարտիրոսյանը, վարույթը նախաձեռվել է Քրեական օրենսգրքի 452-րդ հոդվածի 1-ին մասով, 452-ի՝ 3-րդ մասով, 297-րդ հոդվածի 2-րդ մասի 1-ին կետով և 450-րդ հոդվածի 2-րդ մասի 5-րդ և 7-րդ կետերով՝ խոշտանգման, որը կատարվել է մի խումբ անձանց կողմից անչափահասի նկատմամբ, պաշտոնատար անձի օրինական ծառայողական կամ քաղաքական գործունեությանը միջամտելու նպատակով պաշտոնատար անձի կամ նրա մերձավոր ազգականի կամ մերձավորի կամ նշված անձանց դաստիարակության, խնամքի կամ հսկողության տակ գտնվողի նկատմամբ բռնություն գործադրման և խուլիգանության հատկանիշներով։

Ռոզա Վարդանյան