17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Սեյրան Օհանյանը, Արամ Վարդևանյանը և ևս 13 պատգամավոր Էրիկ Ալեքսանյանի համար անձնական երաշխավորություն են ներկայացրել. դիմումն ուղարկվել է ԱԱԾ
Հասարակություն
28.11.2022 | 14:34
Փաստաբան Էրիկ Ալեքսանյանի նկատմամբ խափանման միջոց երաշխավորություն կիրառելը թույլատրելի համարելու և նրան կալանքից ազատելու համար պաշտպանական կողմը դիմել է ՀՀ գլխավոր դատախազին:
«Էրիկ Ալեքսանյանի դատավարական պարտականությունների պատշաճ կատարումն անձամբ երաշխավորելու պատրաստակամություն են հայտնել ՀՀ ԱԺ պատգամավորներ` Էլինար Վարդանյանը, Գառնիկ Դանիելյանը, Հռիփսիմե Ստամբուլյանը, Արգիշտի Գևորգյանը, Գեղամ Նազարյանը, Սեյրան Օհանյանը, Արծվիկ Մինասյանը, Արթուր Խաչատրյանը, Արմենուհի Կյուրեղյանը, Գեղամ Մանուկյանը, Թադևոս Ավետիսյանը, Աղվան Վարդանյանը, Ագնեսա Խամոյանը, Աննա Գրիգորյանը և Արամ Վարդևանյանը»,- նշում է Ալեքսանյանի պաշտպան Զորայր Հարությունյանը։
Factor.am-ի հետ զրույցում Գլխավոր դատախազությունից հայտնեցին, որ դիմումը փոխանցվել է Ազգային անվտանգության ծառայության, այս պահին այլ նորություններ չկան։
Նշենք՝ Էրիկ Ալեքսանյանը կալանավորվել էր հոկտեմբերի 19-ին՝ դատավոր Արշակ Մաթևոսյանի որոշմամբ, իսկ նոյեմբերի 11-ին հայտնի դարձավ, որ Վերաքննիչ քրեական դատարանի դատավոր Լուսինե Աբգարյանը մերժել է նաև պաշտպանության կողմից ներկայացված վերաքննիչ բողոքը։
Հիշեցնենք` հոկտեմբերի 17-ին հայտնի դարձավ, որ ԱԱԾ-ն ձերբակալել է փաստաբան Էրիկ Ալեքսանյանին։ Առաջադրված մեղադրանքը, Ալեքսանյանի փաստաբան Գայանե Պապոյանի հավաստմամբ, վերաբերում է բացառապես նրա փաստաբանական գրծունեությամբ իրականացված օրինական գործառույթներին, այն է` Ալեքսանյանը, որպես փաստաբան, իր պաշտպանյալին կալանքից ազատելու միջնորդություն է ներկայացրել դատարան։
Նույն գործով անցնում է նաև դատավոր Արուսյակ Ալեքսանյանը, որը նույնպես կալանավորված է։ Նրան մեղադրանք է առաջադրվել պաշտոնեական լիազորությունները չարաշահելու, իսկ փաստաբան Էրիկ Ալեքսանյանին՝ նրան աջակցելու համար:
Ռոզա Վարդանյան
