11.04.2026 | 22:24
Այցելել եմ երեկվա ողբերգական վթարից տուժած փոքրիկներին․ Ավանեսյան
«Փողը հոտ չունի»․ ինչո՞ւ են Հռոմի պապն ու Վատիկանը հրաժարվում քննադատել Բաքվին․ Nouvelles d’Arme՛nie
Քաղաքականություն
28.11.2022 | 13:33
Ֆրանսիացի գրող Սիլվեն Տեսոնը պատմել է, որ Ֆրանսիայի նախագահ Էմանուել Մակրոնի հրավերով Վատիկան կատարած իր վերջին այցի ժամանակ Հռոմի պապին և Վատիկանի արտաքին գործերի նախարարին խնդրել է Ադրբեջանի անունը հիշատակել որպես Հայաստանի նկատմամբ ագրեսորի։ Խնդրանքը, սակայն, Ֆրանցիսկոս պապն ու նախարարը հստակորեն մերժել են․ գրում է Nouvelles d’ Arme՛nie-ն։
Պարբերականի փոխանցմամբ՝ մի քանի օր անց ադրբեջանական մամուլից տեղեկացել են, որ Ադրբեջանի նախագահ Իլհամ Ալիևը նոյեմբերի 24-ին ստացել է Ադրբեջանում Սուրբ Աթոռի նոր առաքելական նվիրակ արքեպիսկոպոս Մարեկ Սոլչինսկու հավատարմագրերը։
«Մարեկ Սոլչինսկին ասում է, որ Հռոմի պապ Ֆրանցիսկոսը խնդրել է փոխանցել իր ողջույնները նախագահ Իլհամ Ալիևին և առաջին տիկին Մեհրիբան Ալիևային: Պետության ղեկավարը ողջունել է Ադրբեջանի մասնակցությունը Վատիկանի պատմական վայրերի վերականգնմանը՝ այն որակելով որպես ներդրում միջմշակութային երկխոսության մեջ։ Դեսպանը հայտարարել է, որ ադրբեջանական կողմը պատրաստ է շարունակել այդ աշխատանքը։ Մարեկ Սոլչինսկին իր գոհունակությունն է հայտնել տարբեր ոլորտներում Ադրբեջանի և Սուրբ Աթոռի միջև համագործակցության զարգացման կապակցությամբ»,- գրում է պարբերականը՝ որպես վերջաբան հավելելով՝ «Փողը հոտ չունի»։
Նշենք, որ ազգությամբ լեհ Մարեկ Սոլչինսկին Ֆրանցիսկոս պապի կողմից 2022 թվականի փետրվար ամսից նշանակվել է նաև Թուրքիայում Վատիկանի դեսպան։ Իսկ մինչ այդ՝ 2011-2017 թթ․, եղել է Վատիկանի առաքելական նվիրակը Հայաստանում, Վրաստանում և Ադրբեջանում։
Անահիտ Խաչատրյան
