Գերմանիան պատրաստվում է Ռուսաստանի հետ պատերազմի. Der Spiegel-ի տրամադրության տակ գաղտնի փաստաթուղթ է հայտնվել

Գերմանական Der Spiegel պարբերականի տրամադրության տակ գաղտնի ռազմավարական փաստաթուղթ է հայտնվել, որտեղ ասվում է, որ Գերմանիան պատրաստվում է Ռուսաստանի հետ պոտենցիալ պատերազմի: Բունդեսվերը 68 էջանոց գաղտնի փաստաթուղթ է պատրաստել ներքին օգտագործման համար դեռ սեպտեմբերին, գրում է Multipolarista-ի ամերիկյան հրատարակությունը։

Բունդեսվերի ղեկավար, գլխավոր տեսուչ Էբերհարդ Ցորնը զգուշացրել է, որ Գերմանիան կարող է հարձակման ենթարկվել, և առաջարկել է Ռուսաստանի հետ ապագա զինված հակամարտության ծրագրեր:

Զեկույցում ասվում է, որ Գերմանիան կանգնած է «էկզիստենցիալ» սպառնալիքի առաջ։ Փաստաթղթի սկզբում նշվում է, որ «Եվրոպայում պատերազմը կրկին իրականություն է»։ Կանխատեսվում է, որ ամենահավանական սցենարը կլինի Ռուսաստանի հետ հակամարտությունը ՆԱՏՕ-ի արևելյան թևում:

Der Spiegel-ը նշել է, որ ռազմավարական փաստաթուղթը շեշտում է «զսպման» անհրաժեշտությունը։

Վերջին մի քանի տասնամյակների ընթացքում գերմանական բանակը կենտրոնացել է փոքր, մասնագիտացված ստորաբաժանումների վրա, սակայն այս զեկույցում ասվում է, որ զինված ուժերն այժմ առաջնահերթություն են տալու մեծ ստորաբաժանումների պատրաստմանը, որոնք միշտ պատրաստ կլինեն պատերազմի:

Փաստաթուղթը վերահաստատում է Բունդեսվերի հավատարմությունը ԱՄՆ-ի գլխավորած ՆԱՏՕ-ի դաշինքին, բայց նաև հստակեցնում է, որ Բեռլինը սկսում է դիտարկել Վաշինգտոնից անկախ իր ռազմավարական ինքնավարությունը:

Der Spiegel-ը փաստաթուղթն ամփոփել է որպես զինված ուժերի «մեգաբարեփոխման» ուրվագիծ:

Տաթև Ֆռանգյան