Շոլցը Ռուսաստանին կոչ է արել դադարեցնել Ուկրաինայի դեմ հրթիռային հարվածները

Գերմանիայի կանցլեր Օլաֆ Շոլցը Ռուսաստանի Դաշնությանը կոչ է արել դադարեցնել հրթիռային հարձակումները Ուկրաինայի խաղաղ բնակչության դեմ։ Քաղաքական գործչի խոսքերը Twitter-ում մեջբերել է Գերմանիայի կառավարության խոսնակ Շտեֆեն Հեբեստրեյթը, գրում է korrespondent-ը։

«Ուկրաինայի խաղաղ բնակչության դեմ հրթիռային ահաբեկչությունը պետք է անհապաղ դադարեցվի»,- ասել է Շոլցը Կիպրոսի նախագահ Նիկաս Անաստասիադիսի հետ ճեպազրույցի ժամանակ։

Նախօրեին ելույթ ունենալով Բունդեսթագում 2023 թվականի բյուջեի նախագծի քննարկման շրջանակում՝ կանցլերը խոստացել էր Ուկրաինայի Զինված ուժերին անհրաժեշտ սպառազինություն մատակարարել այնքան ժամանակ, քանի դեռ չի դադարել Ռուսաստանի սկսած պատերազմը։

«Հենց այս կառավարությունն է, հակառակ տասնամյակների պետական պրակտիկայի, որոշել աջակցել Ուկրաինային զենքով, որն անհրաժեշտ է նրա ամենօրյա խիզախ պաշտպանական պայքարում: Եվ մեր ամենամոտ դաշնակիցների հետ ուս ուսի տված դա կանենք այնքան ժամանակ, քանի դեռ չի դադարեցվել այս անիմաստ, դաժան, հանցավոր պատերազմը»,- Շոլցի խոսքերն է մեջբերում DW-ն։

Հիշեցնենք, որ նոյեմբերի 23-ին ռուսական զորքերը հերթական զանգվածային հրթիռային հարձակումն էին իրականացրել, ինչը հանգեցրել է էլեկտրաէներգիայի անջատման ամբողջ Ուկրաինայում։ Հարձակման են ենթարկվել Կիևի, Վիննիցայի, Լվովի և Զապորոժիեի շրջանների բնակելի շենքերը, ՋԷԿ-երը, ջերմակայանները և էլեկտրական ենթակայանները։

Ուկրաինայի հակաօդային պաշտպանությունն արձակված շուրջ 70 հրթիռից ոչնչացրել է հինգ անօդաչու թռչող սարք և 51 հրթիռ։

Տաթև Ֆռանգյան