Երեխային Դեբեդ գետը նետելու մեջ մեղադրվող կինը կշարունակի գտնվել կալանքի տակ

Լոռու մարզի ընդհանուր իրավասության դատարանը՝ նախագահությաբ դատավոր Տարոն Թադևոսյանի, որոշել է 3 ամսով երկարացնել երեխային Դեբեդ գետը նետելու մեջ մեղադրվող կնոջ՝ Ս․Խ․-ի կալանավորման ժամկետը։ Այս մասին տեղեկանում ենք «Դատալեքս» դատական-տեղեկատվական համակարգից։ Մեղադրյալ Ս․Խ․-ն կշարունակի կալանավորված մնալ մինչև փետրվարկի 25-ը։

Հիշեցնենք․ որ կինը մեղադրվում է իր երեխայի սպանություն փորձի մեջ։ Ապրիլի 26-ին նա իրավապահներին հայտնել է, որ հսկողությունից դուրս մնալու պատճառով իր 2 տարեկան երեխան Ալավերդի քաղաքի Փիրուզյան թաղամասի երկաթուղային կամրջի հարևանությամբ ձգվող գազատար խողովակի վրա նստած դիրքից ընկել է Դեբեդ գետը։ Երկամյա փոքրիկին անգիտակից վիճակում գտել և ջրից դուրս է բերել Լոռու մարզի բնակիչ Ժիրայր Պողոսյանը։ Բժիշկներին հաջողվել է փրկել նրա կյանքը։

Շուտով Քննչական կոմիտեում քրեական գործ է հարուցվել սպանության փորձ կատարելու հոդվածով, երեխայի 30-ամյա մայրը բերման է ենթարկվել՝ այդ արարքը կատարելու կասկածանքով։ Բերման ենթարկվելուց հետո մայրը խոստովանել է, որ մանկահասակ դստերն ինքն է նետել գետը ջրահեղձ անելու միջոցով սպանելու դիտավորությամբ։ Մորը մեղադրանք է առաջադրվել երեխային սպանելու փորձի համար։ Շուրջ 4 ամիս տևած նախաքննությունից հետո՝ օգոստոսի 9-ին, գործն ուղարկվել է դատարան։ Օգոստոսի 22-ին տեղի ունեցած դատական նիստի ընթացքում դատավորը որոշել է մինչև նոյեմբերի 25-ը երկարացնելն Ս․Խ․-ի խափանման միջոց կալանավորման ժամկետը։

Այս ժամկետը լրանալուց առաջ դատավորը կրկին անդրադարձել է խափանման միջոցի հարցին, ու, փաստորեն, որոշել ևս մեկ անգամ երեք ամսով երկարացնել մեղադրյալի կալանքի ժամկետը։

Ս․Խ․-ն ընդունում է իրեն առաջադրված մեղադրանքը, խոստովանել է, որ երեխային գետն է նետել՝ սպանելու դիտավորությամբ։ Խափանման միջոցի հարցի քննության ժամանակ պաշտպանը պնդել է, որ մեղադրանքն ընդունելու պայմաններում Ս․Խ․-ն չի փորձի անօրինական ազդեցություն գործադրել վկաների նկատմամբ, չի կարող նաև թաքնվել քննությունից, քանի որ երկրից դերս բարեկաներներ չունի, ըստ էության, թաքնվելու վայր չունի, իսկ հանրային մեղադրողը պնդել է, որ Ս․Խ․-ին կալանքի տակ պահելու հիմքեր դեռևս առկա են։

Ուշագրավ է, որ մինչ այս էլ Ս․Խ․-ի երկու երեխաները ծխահարման հետևանքով մահացել էին Ռուսաստանի Դաշնությունում։ 2019 թվականին կինը Ռուսաստանի Դաշնության քրեական օրենսգրքի 109-րդ հոդվածի 3-րդ մասով դատապարտվել էր 1 տարի ժամկետով ազատազրկման, սակայն պատիժը պայմանականորեն չի կիրառվել։ Ըստ գործի՝ կնոջ անփութության հետևանքով վերջինիս երկու աղջիկները իրենց բնակատեղի հանդիսացող կիսակառույց մարագում ծխահարվել ու մահացել են։

Արաքս Մամուլյան