13.04.2026 | 12:34
Զատկի հրադադարն ավարտվեց. ռուսական և ուկրաինական կողմերը հայտարարում են խախտումների մասին
Հայ-ադրբեջանական սահմանին լարվածությունը պահպանվում է. ՀԱՊԿ գլխավոր քարտուղար․ ՏԵՍԱՆՅՈՒԹ
Քաղաքականություն
23.11.2022 | 12:34
Հայաստանի և Ադրբեջանի սահմանին լարվածությունը պահպանվում է․ գրեթե ամեն օր փոխհրաձգություններ են տեղի ունենում։ Այս մասին հայտարարել է ՀԱՊԿ գլխավոր քարտուղար Ստանիսլավ Զասը՝ Երևանում ելույթ ունենալով ՀԱՊԿ անդամ երկրների ԱԳ նախարարների խորհրդի, պաշտպանության նախարարների խորհրդի և ՀԱՊԿ Անվտանգության խորհուրդների քարտուղարների կոմիտեի համատեղ նիստում։
«Պահպանվում է հայ-ադրբեջանական սահմանին լարվածությունը։ Այն տեղեկությունը, որը մենք ստանում ենք ՀԱՊԿ արձագանքման կենտրոնի միջոցով, հաստատում է, որ փաստացի ամեն օր հայ-ադրբեջանական սահմանին փոխհրաձգություն է գրանցվում»,- ասել է նա։
Զասը նշել է, որ այս իրավիճակի հետ կապված սպառնալիքների քննարկմանը նվիրվել է ՀԱՊԿ Հավաքական անվտանգության խորհրդի 3 արտահերթ նստաշրջան՝ այս տարվա մայիսին, սեպտեմբերին և հոկտեմբերին։
Հիշեցնենք՝ Երևանում նոյեմբերի 23-ին մեկնարկել է Հավաքական անվտանգության պայմանագրի կազմակերպության արտաքին գործերի նախարարների, պաշտպանության նախարարների և Անվտանգության խորհուրդների քարտուղարների համատեղ նիստը։
Ավելի ուշ, Հայաստանի Հանրապետության վարչապետ Նիկոլ Փաշինյանի նախագահությամբ տեղի կունենա ՀԱՊԿ Հավաքական անվտանգության խորհրդի նիստը։
Հավաքական անվտանգության խորհրդի անդամները կքննարկեն միջազգային և տարածաշրջանային անվտանգության արդի խնդիրները և ՀԱՊԿ գործունեության հիմնական արդյունքները միջնստաշրջանային շրջանում: Ամենակարևոր հարցերից մեկը կլինի ՀԱՊԿ ճգնաժամային արձագանքման համակարգի կատարելագործումը և Հայաստանի Հանրապետությանը օգնության տրամադրման համատեղ միջոցառումների քննարկումը։
ՀԱՊԿ Հավաքական անվտանգության խորհրդի նիստի ընթացքում նախատեսվում է ընդունել Հավաքական անվտանգության խորհրդի հռչակագիրը։
Խորհրդի նիստի ընթացքում կստորագրվեն մի շարք փաստաթղթեր, որոնք վերաբերում են խաղաղապահ ուժերին ժամանակակից սպառազինությամբ, ռազմական և հատուկ տեխնիկայով զինելուն, ճառագայթային, քիմիական և կենսաբանական համատեղ պաշտպանության ձևավորմանը։
2023 թվականի հունվարի 1-ից կայանալիք ռոտացիայի կապակցությամբ կքննարկվի նաև ՀԱՊԿ գլխավոր քարտուղարի հարցը։
Մանրամասները՝ տեսանյութում։
Տաթև Ֆռանգյան
