09.10.2026 | 15:35
Երևանում սպասվում են կարճատև անձրևներ
Գյումրիում ծառի վրա բարձրացած երիտասարդն իջնելուց հետո ինքնահրկիզվել է. ԼՈւՍԱՆԿԱՐՆԵՐ
Հասարակություն
22.11.2022 | 20:56
Գյումրիում այսօր ժամը 13։30-ից մի երիտասարդ բարձրախոսը ձեռքին բարձրացել էր քաղաքի կենտրոնում` Թատերական հրապարակում գտնվող եղևնիներից մեկի վրա և հրաժարվում էր իջնել։ Նա խոսում էր հայ ժողովրդի միասնական լինելու անհրաժեշտությունից, հայրենասիրությունից ու հավատքից, պարբերաբար սպառնում ինքնասպան լինել իր մոտ եղած թույնով։
Երիտասարդը հավաստիացնում էր, որ հոգեպես նորմալ վիճակում է, նաև պահանջում, որ հրապարակ գա ՀԱԵ Շիրակի թեմի առաջնորդ Միքայել արքեպիսկոպոս Աջապահյանը։ Սրբազանի փոխարեն եկավ այլ հոգևորական, սակայն նա չհամաձայնեց ծառից վայր իջնել։
Հավաքված ոստիկաններն ու քաղաքացիները բանակցում էին երիտասարդի հետ, խնդրում իջնել ծառից ու իր գաղափարները բարձրաձայնել հրապարակում։
Քիչ առաջ հրապարակ եկավ երիտասարդի ընկերը, կարողացավ նրան համոզելով ծառից իջեցնել, սակայն բողոքավորը վայր իջնելուն պես ինքնահրկիզվեց։ Պարզվում է` նրա մոտ ոչ թե թույն էր, այլ բենզին։
Երիտասարդին շտապօգնության մեքենայով տեղափոխեցին «Գյումրի» բժշկական կենտրոն։ ԲԿ֊ի փոխտնօրեն Արմեն Խաչատրյանից տեղեկացանք, որ նրան հիվանդանոց են տեղափոխել պարանոցի, իրանի, շնչուղիների տարբեր` 3-4 աստիճանի այրվածքներով։ Ըստ Խաչատրյանի՝ նախնական հետազոտությամբ՝ նրա մարմնի մակերեսի 30֊40 տոկոսն այրված է։
Արմիկ Մովսիսյան
