22.03.2026 | 21:42
Վահագն Խաչատուրյանն առանձնազրույց է ունեցել Վրաստանի նախագահի հետ
Տրոլեյբուսի դռներ՝ շենքի մուտքին, կաթացող տանիք․ բնակիչ-համատիրություն չլուծվող թնջուկը. ՏԵՍԱՆՅՈՒԹ
Հասարակություն
22.11.2022 | 18:47
Նոր Նորքի 6-րդ զանգվածի 1-ին միկրոշրջանի շենքերից մեկի բնակիչները դժգոհություններ ունեն՝ շենքի հետ կապված ամենատարբեր խնդիրներով պայմանավորված։ Նախ՝ մուտքի դռներն են ցույց տալիս, որ չփակվելու պատճառով ազատ ելումուտ են ապահովում թափառող շների համար, հետո՝ բակի բետոնե կիսափուլ հենապատը, որ ամեն անձրևի հետ ավելի ու ավելի է քանդվում։ Բայց որպես ամենամեծ խնդիր մուտքերի կոտրված ապակիներն են ներկայացնում։
Անձրևից հետո իրավիճակը ոչ միայն մուտքերում, այլև բնակարաններում է սարսափելի՝ ասում է տիկին Ռոզան, որ արդեն քանի տարի է՝ պայքարում է տարբեր կառույցների դիմելով ու լուծում այդպես էլ չստանալով։ Ասում է՝ շենքի տանիքը 2016 թվականին է հիմնովին նորոգվել, բայց խնդիրն այդպես էլ չի լուծվել։
Բնակարանի բոլոր սենյակներում պատկերը նույնն է․ անձրևները սկսվելուն պես ամենուր կաթոցներ են։
Իրավիճակը նույնն է վերևի հարկի բոլոր բնակարաններում։ Իհարկե, ոմանք կարողացել են սեփական միջոցներով նորոգել տանիքն ու պաշտպանվել անձրևից, իրենք այդ հնարավորությունը չունեն՝ ասում է տիկին Ռոզան։
Բնակիչները վստահեցնում են՝ համատիրությանը մինչև 2019 թվականը բոլոր վճարները կատարել են, բայց չլուծվող խնդիրներից հետո այլևս չեն վճարում։ Ասում են՝ պատրաստ են միանվագ ամբողջ պարտքը փակել, եթե վստահ լինեն, որ խնդիրները կլուծվեն։
Համատիրության նախագահը տեսախցիկի առջև խոսել չցանկացավ, կադրից դուրս միայն ասաց, որ տանիքի նորոգումից մի քանի տարի անց են միայն սկսել կաթոցները, իսկ մատնանշված բոլոր խնդիրները ներառված են հաջորդ տարվա ծրագրում և լուծում կստանան․ միայն այսքանը։
Համատիրությունների ոչ բավարար աշխատանքի մասին դժգոհություններին Factor TV-ն պարբերաբար է անդրադառնում․ ի պատասխան բնակիչների դժգոհությունների՝ համատիրություններն էլ սովորաբար մեջբերում են բնակիչների կողմից չկատարվող վճարային պարտավորությունները։ Օրենքի համաձայն՝ համատիրությունը պետք է կառավարի, պահպանի, նորոգի ու սպասարկի շենքի բնակիչների ընդհանուր սեփականությունը, այսինքն՝ շենքը կրող կառուցվածքները, առաստաղները, հատակները, նկուղներն ու ձեղնահարկը, տանիքն ու մուտքերը, աստիճանավանդակները, վերելակները և այլ տարածքներ։
Համատիրությունները կամավոր միավորումներ են, գործում են անկախ, ֆինանսավորվում բնակիչների կողմից կատարված վճարումների հաշվին։ Ինչպե՞ս ու ի՞նչ մեխանիզմներով պետք է խնդիրը կարգավորվի․ մինչ այսօր այդ մեխանիզմը, փաստորեն, չկա՝ չնայած նրան, որ «Համատիրությունների մասին» առաջին օրենքը Հայաստանում ընդունվել է գրեթե քառորդ դար առաջ՝ 1996 թվականին։
Մանրամասները՝ տեսանյութում։
Սաթենիկ Հայրապետյան
