Աստված մի արասցե, վաղը մութ ուժերը հետ գան և ուզեն հրապարակային քննարկումներից զերծ մնալ. Ավինյան․ ՏԵՍԱՆՅՈՒԹ

Երևանի ավագանու նիստերում նախագծերը կքննարկվեն նաև չզեկուցվող ընթացակարգով․ խնդիրը գաղտնիության մեջ չէ, այլ նիստերի անցկացման արդյունավետության։

«Պետք է հակառակ ուղղությամբ շարժվենք և ավելացնենք այն մեխանիզմները, որոնցով գործադիրը շատ ավելի մանրամասն կզեկուցի հարցերը, որովհետև մենք պատասխանատու ենք քաղաքացների առաջ»,- այս կարծիքը հայտնեց Երևանի վագանու անդամ Սաթենիկ Մկրտչյանը։

«Ես կարող եմ նախկին իմ փորձով կիսվել,- նշեց փոխքաղաքապետ Տիգրան Ավինյանը: -Համեմատությունները համադրելի չեն՝ կառավարության, ավագանու և խորհրդարանի նիստերը, բոլոր դեպքերում եկեք պատկերացնենք, թե ինչպիսի հարցեր կարող են չզեկուցվել:
Ամենայն հավանականությամբ, այն հարցերը, որոնք որ զեկուցվում են, միաձայն անցնում են, հենց էդ տրամաբանությամբ էլ պետք է այս գործիքն աշխատի: Երկրորդն, ինչի ավագանու նիստերն այդքան համեմատելի չեն կառավարության հետ, քանի որ կառավարությունում ընդդիմություն չկա, ավագանին ունենալու է ընդդիմություն:

Աստված մի արասցե, վաղը ինչ-որ նոր իշխանություն ձևավորվի, մութ ուժերը հետ գան և ուզեն հրապարակային քննարկումներից զերծ մնալ և ինչ-որ բաներ կոծկել չզեկուցվող հարցերով, ընդդիմությունը միշտ հնարավորություն ունի էդ հարցը բարձրաձայնելու և ավելի մեծ աղմուկ բարձրացնի, քան եթե հարցը զեկուցվող լինի:

Իրականում, այո, որոշակի փոքրիկ ռիսկեր կան, բայց սա գաղտնի ընթացակարգի մասին չէ, սա կրկին հրապարակային քննարկման մասին է, այդ նախագծերը հրապարակելու մասին է, ուղղակի այն ընթացակարգային որոշումները, որոնք որպես կանոն քննարկում չեն ենթադրում, հարցեր չեն ենթադրում և միակողմանի և միաձայն անցնում են, ուղղակի ավագանիները կարողանում են և՛ իրենց ժամանակը, և՛ երևանցիների ժամանակը խնայել»։

Մանրամասները՝ տեսանյութում։