Դավիթ Բալայանը կնշանակվի Վերաքննիչ քրեական դատարանի դատավոր

Բարձրագույն դատական խորհրդի նախագահ Կարեն Անդրեասյանը Վերաքննիչ քրեական դատարանի դատավորի պաշտոնում առաջարկել է այս պահին ամենաբարձր վարկանիշ ունեցող, Երևան քաղաքի ընդհանուր իրավասության դատարանի դատավոր Դավիթ Բալայանի թեկնածությունը։

«Վերաքննիչ դատարաններում դատավոր նշանակվելու համար առաջխաղացման ենթակա դատավորների թեկնածուների ցուցակի քրեական մասնագիտացման բաժնի թեկնածու Դավիթ Բալայանին առաջարկել Վերաքննիչ քրեական դատարանի դատավորի պաշտոնի թափուր տեղում իր թեկնածությունը՝ Հանրապետության նախագահի նշանակմանը ներկայացնելու նպատակով»,- նշվում է ԲԴԽ որոշման մեջ, որն արդեն ուղարկվել է ՀՀ նախագահին։

Նշենք, որ Դավիթ Բալայանն առաջին անգամ դատավոր է նշանակվել 2001 թվականին՝ զբաղեցնելով Գեղարքունիքի մարզի առաջին ատյանի դատարանի դատավորի պաշտոնը։ Նա մի շարք աղմկահարույց քրեական գործեր է քննել, որոնց թվում է «Նուբարաշեն» ՔԿՀ-ում խոշտանգված Արմեն Աղաջանյանի, ՊՎԾ նախկին պետ Դավիթ Սանասարյանի (վերջինիս գործը դեռևս դատաքննության փուլում է), «Շենգավիթ» ԲԿ-ի մանկաբարձ-գինեկոլոգներ Շուշանիկ Բախշյանի և Անի Բաբելյանի ու այլոց գործերը։

Դավիթ Բալայանի հայրը՝ Կիմ Բալայանը, եղել է ՀՀ Սահմանադրական դատարանի անդամ, եղբայրը՝ Գաբրիել Բալայանը, 2018-2020 թվականներին զբաղեցրել է պաշտպանության փոխնախարարի պաշտոնը, մյուս եղբայրը՝ Տիգրան Բալայանը, 2018 թվականին նշանակվել է Նիդեռլանդներում Հայաստանի արտակարգ և լիազոր դեսպան։

Ռոզա Վարդանյան