13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Շվեդիայի դեսպանը կանչվել է Թուրքիայի ԱԳՆ՝ «Էրդողանին վիրավորող պատկերների պատճառով»
Քաղաքականություն
22.11.2022 | 15:49
Անկարայում Շվեդիայի դեսպան Ստեֆան Հերսթրյոմը նախօրեին կանչվել է Թուրքիայի ԱԳՆ։ Այս մասին հայտնում է թուրքական պետական Անադոլու գործակալությունը՝ վկայակոչելով դիվանագիտական իր աղբյուրներին։
Նշվում է, որ դեսպանին բողոք են հայտնել՝ կապված «Ստոկհոլմում Թուրքիայի դեսպանատան մոտ տեղի ունեցած սադրանքի հետ»։
Նախօրեին քրդերը բողոքի ակցիա էին կազմակերպել Թուրքիայի դեսպանատան մոտ ու շենքի վրա ցուցադրել պատկերներ, որոնք, ըստ Անկարայի, PKK-ի «ահաբեկչության քարոզչություն» են պարունակում և վիրավորում Թուրքիայի նախագահ Ռեջեփ Թայիփ Էրդողանին։
Շվեդիայի դեսպանին տվյալ գործողությունը դատապարտելու և այն հետաքննելու պահանջ է ներկայացվել։
Թուրքիայի ԱԳՆ-ն նշել է, որ Անկարան ակնկալում է, որ այս «անընդունելի արարքի մեղավորները կբացահայտվեն և նրանց դեմ անհրաժեշտ միջոցներ կձեռնարկվեն»։ Դեսպանին նաև ասվել է, որ թուրական կողմը Շվեդիայից կոնկրետ քայլեր է ակնկալում՝ կապված պարտավորությունների հետ, որոնք ամրագրված են Թուրքիայի, Շվեդիայի և Ֆինլանդիայի հուշագրում։
Հավելենք, որ Թուրքիան և Հունգարիան ՆԱՏՕ-ի անդամ միակ երկրներն են, որոնք դեռ չեն վավերացրել Սկանդինավյան երկրների՝ դաշինքին անդամակցելու հայտերը։
Էմմա Չոբանյան
