Իրականացվել է օդի նմուշառում. չափիչ սարքերը վտանգավոր ոչինչ չեն հայտնաբերել․ ԱԻՆ հրահանգիչ․ ՏԵՍԱՆՅՈՒԹ

Տեղում իրականացվել է օդի նմուշառում. չափիչ սարքերը վտանգավոր ոչինչ չեն հայտնաբերել։ Այս պահին տեղում տարօրինակ հոտ չի զգացվում․ տեղեկացնում են ՀՀ ԱԻՆ-ից։

Հիշեցնենք, որ նոյեմբերի 22-ին, ժամը 10:30-ին Ճգնաժամային կառավարման ազգային կենտրոն ահազանգ էր ստացվել, որ Երևանի Պարույր Սևակի թիվ 77 հասցեում՝ Հայաստանի պետական տնտեսագիտական համալսարանի մասնաճյուղում, ուսանողների ինքնազգացողությունը վատացել է․ շենքում զգացվել է տարօրինակ հոտ: Անհրաժեշտ է փրկարարների օգնությունը։

Դեպքի վայր էին մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և Բնակչության պաշտպանության և աղետների ռիսկի նվազեցման վարչության Ճառագայթային, քիմիական և կենսաբանական իրավիճակի մոնիտորինգի բաժնի քիմիկ-հետախույզների խումբը:

«Գազաանալիզատորը ոչինչ չի հայտնաբերել։ Նկուղից սկսած մինչև վերջին հարկ ստուգել ենք` ո՛չ քիմիական նյութի առկայություն, ո՛չ գազի արտահոսք չենք հայտաբերել. տարածքը մաքուր է, մարդկանց կյանքին վտանգ չի սպառնում»,- լրագրողների հետ զրույցում նշեց ԱԻՆ Ճառագայթային քիմիական կենսաբանական մոնիթորինգի բաժնի ավագ հրահանգիչ, փոխգնդապետ Ավանեսյանը։

Նա նաև հավելեց, որ շենքը գազաֆիկացված չէ, այնպես որ` արտահոսքի մասին խոսք լինել չի կարող։ Փոխգնդապետը ենթադրեց, որ հնարավոր է`ուսանողներից մեկը փոքրիկ գազաբալոն է իր հետ բերել համալսարան, բայց քանի որ մինչև ԱԻՆ–ի ժամանելը տարածքն արդեն օդափոխված է եղել` սարքերը ոչինչ չեն ֆիքսել։

Տուժածներ, ըստ ԱԻՆ ներկայացուցչի, չկան։

Factor.am-ը ՀՊՏՀ-ում էր, լուսաբանում էր միջադեպը դեպքի վայրից։

Մանրամասները՝ տեսանյութում։