16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
ԱՄՆ-ը դեմ է ցանկացած ռազմական գործողության․ Պետդեպը՝ Սիրիայում և Իրաքում Թուրքիայի ռազմաօդային գործողության մասին
Քաղաքականություն
22.11.2022 | 14:46
ԱՄՆ-ը դեմ է ցանկացած ռազմական գործողության, որն ապակայունացնում է իրավիճակը Սիրիայում։ Այս մասին հայտարարել է Պետքարտուղարության խոսնակ Նեդ Փրայսը Սիրիայում և Իրաքում Թուրքիայի ռազմաօդային գործողության ու քուրդ զինյալների պատասխան գործողությունների ֆոնին, գրում է Reuters-ը։
Պաշտոնյան ասել է, որ Վաշինգտոնն Անկարային հայտնել է իր լուրջ մտահոգությունները «Իսլամական պետության» դեմ պայքարի վրա էսկալացիայի ազդեցության վերաբերյալ։
«Մենք կոչ ենք արել Թուրքիային նման գործողություններից հրաժարվել, ճիշտ այնպես, ինչպես մենք կոչ ենք արել մեր սիրիացի գործընկերներին՝ զերծ մնալ հարձակումներից կամ էսկալացիայից։ Մենք Սիրիայում ապաէսկալացիայի կոչ ենք անում՝ պաշտպանելու քաղաքացիական անձանց կյանքը և աջակցելու ԻԼԻՊ-ին հաղթելու ընդհանուր նպատակին։ Մենք շարունակում ենք դեմ լինել Իրաքում ցանկացած չհամակարգված ռազմական գործողության, որը խախտում է Իրաքի ինքնիշխանությունը»,- նշել է Փրայսը։
Հավելենք, որ Թուրքիայի ռազմաօդային ուժերն Իրաքի և Սիրիայի հյուսիսում քրդերի դեմ ավիագործողություն են իրականացրել։ Թուրքիայի նախագահ Ռեջեփ Թայիփ Էրդողանը չի բացառել, որ Անկարան կարող է նաև ցամաքային գործողություն իրականացնել։ Կան տասնյակ զոհեր քաղաքացիական բնակչության շրջանում։
Ի պատասխան Անկարայի գործողությունների՝ Սիրիայի հյուսիսից նախօրեին 5 հրթիռ է արձակվել Թուրքիայի հարավային Գազիանթեփի ուղղությամբ, որի հետևանքով կան զոհեր ու վիրավորներ։
Էմմա Չոբանյան
